“Həyatyanı sahəmdə kartof və yonca əkmişdim. Təkcə bu iki məhsulun
toxum xərci 2000 lari edirdi. Toxumları nisiyə aldım ki, məhsulumu
yığıb satım, həm biraz qazanc götürüm, həm də borcumu qaytarım.
Amma bütün məhsullarım yanıb külə döndü”
.
Bu sözlərin deyən Namiq Hüseynov Marneuli rayonunun Ermənistanla
sərhəddə yerləşən Qaçaqan kəndinin sakinidir. Onun kimi kənddəki
əksər fermerlər suvarma suyunun yoxluğu səbəbi ilə məhsullarının
məhv olması təhlükəsi ilə qarşılaşıblar.
Buna səbəb Qaçaqandakı fermerlərlə yanaşı Kvemo-Kartli regionunda
bir çox kəndlərin də suvarma üçün istifadə etdiyi Xram çayında
suyun iyunundan azalmağa başlamasıdır. Xrama isə su Ermənistandakı
Debeda çayından gəlib tökülür. Hər iki çayda suyun səviyyəsinin
aşağı düşməsi nəticəsində Qaçaqanla yanaşı daha dörd kəndi;
Qasımlı, Ağa Məmmədli, Xancıqazlı və Kirəç Muğanlını suvarma suyu
ilə təmin edən arx müəyyən ərazilərdə tam quruyub.
Ümumilikdə isə iyundan düşən kəskin istilər səbəbi ilə bütün
Kvemo-Kartli regionunda quraqlıq yaşanır. Əsasən etnik
azərbaycanlıların yaşadığı bu regionda əhalinin əsas məşğuliyyəti
kənd təsərrüfatıdır.
Namiq Hüseynov bildirdi ki, yaranmış problemlə bağlı elə ilk gündən
əlaqədar qurumlara müraciət edib. Dövlət qurumlarından fermerlərə
problemin tezliklə aradan qaldırılacağı ilə bağlı vədlər verilsə
də, vəziyyəti nisbətən yaxşılığa doğru dəyişmək üçün belə heç bir
addım atılmayıb:
“Bütün kənd camaatını əmin etdilər ki, problemin həll olmasına
çalışırlar. Biz də inanın ümid etdik ki, problem tezliklə aradan
qalxar. Amma gördüyünüz kimi bütün kənd camaatının məhsulları
tarlalarda yandı. Bu kəndin camaatının əsas dolanışığı da
əkin-biçin idi, o da belə oldu, indi biz nə edək?”.
Ümumiyyətlə ölkənin çaylarında suyun səviyyəsi iyun və avqust
aylarında bir qədər azalır. Kvemo-Kartlidə fermerlər suvarmada
əsasən region ərazidən keçən çaylardan istifdə etdiyindən həmin
aylarda su sarıdan sıxıntılar hər zaman yaşanıb. Lakin son illər
yağıntıların azalması və kəskin istilər səbəbi ilə quraqlıq
probleminə də tez-tez təsadüf olunur.
İllərlə zəhmət çəkib bağ saldığını, qəpik-qəpik pul toplayıb
tərəvəzlər üçün toxumlar aldığını deyən Hüsü Vəliyev də
məhsullarının böyük qisminin zay olmasından giley edir:
“Bu ilki əkin üçün etdiyim xərclərin hamısı hədər getdi. Mənim kimi
bütün fermerlər böyük ziyana düşüb. Suyun olmaması maldarlığa da
ciddi ziyan vurub. Su olmadığından yem əkilən sahələr də quruyub və
eləcə də mal-qaranı su ilə təmin etmək də müşkül məsələyə
çevrilib”.
Digər Qaçaqan kənd sakini “Böyük birlik” ictimai təşkilatının sədri
Əsəd Əliyev isə problemin yaranmasında maraqlı tərəflərin olduğunu
iddia edir. Kənddəki arxın suyun qarşısının Ermənistan tərəfinin
qəstdən kəsdiyini deyən Ə.Əliyev bunu Qaçaqanda əsasən
azərbaycanlıların olması ilə əsaslandırır:
“Gürcüstan tərəfi də problem həll etməkdə həvəsli deyil. Məqsəd
kəndliləri torpaqdan soyutmaq və öz torpaq sahələrini satmağa
məcbur durumda buraxmaqdır. Nəticədə torpaqları
qeyri-azərbaycanlılar gəlib alır. Hər il biz belə halların şahidi
oluruq. Suyu olmayan kəndli ziyana məruz qaldığına görə, borcunu
ödəmək üçün torpağını satmağa məcbur olur. Hər il hektarlarla
torpağı qeyri azərbaycanlılar gəlib alırlar”.
Əsəd Əliyevin sözlərinə görə, hazırda 6 mindən çox əhalisi olan
Qaçaqan kəndinin əkin sahələrinin təxminən yarısını, 500 hektarını
gürcü iş adamları alıb.
Gürcüstan Qarapapaq Türkləri Birliyinin rəyasət heyətinin üzvü olan
digər kənd sakini Daşqın Gülməmmədov isə deyir ki, bəzi fermerlər
əkin sahələrini xilas etmək üçün suyu pulla almağa məcbur
olurlar:
“Suyu kəndlərə xüsusi maşınlar gətirib satır. Biz düşünürük ki,
bəzi məmurlar bu problemdə maraqlıdırlar və kəndləri su ilə
doğru-dürüst təmin etmirlər ki, camaat pulla almağa məcbur qalsın.
Əvvəlki illərdə də belə problem olub, camaat şikayət etdikdən sonra
məmurların gəlir məqsədi ilə vəziyyətdən sui-isitfadə etdikləri
təstiqini tapıb və kimlərsə işdən çıxarılıb, cəzalandırılıb. Lakin
yenə də hər dəfə bu neqativ hallar təkrarlanır”.
Qaçaqan və ona qonşu kəndlərdə suvarma su ilə bağlı yaranmış
çətinliyin havaların isti keçməsi ilə əlaqədar olduğunu deyən
Marneuli Bələdiyyəsinin Qaçaqan kəndi üzrə nümayəndəsi Ehtiram
Əliyev, vəziyyətdən kimlərinsə sui-istifadə edib gəlir əldə etməyə
çalışması haqda da iddiaları rədd etdi:
“Kimlərinsə kəndlərə gələn suyu qəsdən əngəlləməsi faktına mən
indiyədək rast gəlməmişəm. Ermənilərin suyun qarşısını kəsməsinə
gəldikdə isə, mən bu haqda heç nə eşitməmişəm. Illərin təcrübəsi
göstərir ki, bu təbii proseslərin nəticəsidir. Istilərin düşməsi
ilə əlaqədar olaraq çaylarda su azalıb. Biz hazırda bir növ
fövqaladə şəraitindəki kimi işləyirik. Su təsərrüfatı idarəsi ilə
birgə çalışırıq növbə ilə bütün kəndlərə su verək”.
Bələdiyyə nümayəndəsi bildirir ki, Qaçaqan kəndində 1000 hektara
yaxın əkin sahələri var və daha ciddi suvarma problemi onların
təxminən 30 faizində yaranıb. Ehtiram Əliyevin sözlərinə görə,
Sovetlər dövründə Kvemo-Kartlidə əkin planlı şəkildə həyata
keçirildiyindən bu ərazilərdə su anbarları tikilməsinə ehtiyac
duyulmayıb. Bu günədək əhalinin suvarmada əsas istifadə etdiyi
mənbələr çaylardır. Müsahibin sözlərinə görə, quraqlıq dövürlərində
vəziyyəti stabilləşdirmək üçün kəndlərdə artesian quyularının
qazılmasına ehtiyac var.
Qaçaqan sakinləri deyir ki, kənddəki su problem həll edilməsi
yubandıqca onlara dəyən ziyanın həcmi də böyüyür. Əgər vəziyyət bir
qədər də belə sürərsə, maldarlar da ciddi itgilərlə üz-üzə qala
bilər.
Xəyal Əzizov