Ulaşlı sakini tövləsinin qəsdən yandırıldığını düşünür
Marneuli bələdiyyəsinin Ulaşlı kəndinin sakini
İsgəndər Süleymanovun tövləsi yanıb.
Onun
“Marneuli” radiosuna bildirdiyinə görə, tövləsini qəsdən
yandırıblar. Hadisə bu gün, 21 fevral tarixində günorta saatlarında
baş verib.
“Qəsdən olmuş işdir. Zəng vurdular, mən gələndə
axırıncı spiçkanı vururdu tövlənin yanında. Malın içinə girdim ki,
görüm salamat qalan nə var, onadək sağolsunlar, uşaqlar
çıxarmışdılar, heç nə yox idi, hərləndim belə ki, deyəm niyə
yandırırsan, ona kimi maşına minib qaçdı. Adı Zeynalov Həsrətdir,
bizim meriyada işləyən Coşqunun atası”, – İsgəndər
Süleymanov deyir.
Süleymanovun tövləsinin ancaq bir hissəsi yanıb. O, qeyd etdi ki,
qonşuları heyvanları çıxarmağa nail olublar və heyvanlar xəsarət
almayıb.
"Marneuli" radiosu