Azərbaycanın apa.az informasiya agentliyinin
saytına giriş mümkün deyil. Yayılmış məlumata əsasən, 1 avqust
tarixində prezidentin sözlərini təhrif etdiyinə görə rəhbərlik özü
saytı bağlamaq qərarına gəlib.
Azərbaycan prezidenti İlham Əliyev Qarabağ müharibəsi veteranlarına
və Çernobıl faciəsi nəticəsində əlil düşmüş şəxslərə maşın və ev
verilməsi tədbirində çıxış edib. Apa.az informasiya agentliyi əsas
səhifəyə “Azərbaycan Prezidenti: Ermənistanı çökdürəcəyik”
başlığını çıxarıb. Məqalə yayımlandıqdan sonra prezident
administrasiyası agentliyi yanlış məlumat yaymaqda ittiham edib və
yayılmış məlumatı təkzib edib.
Agentlik oxuculardan rəsmi
şəkildə üzr istəyib. Lakin bu gün səhər saatlarından sayta girmək
mümkün olmayıb. Azərbaycanda fəaliyyət göstərən jurnalistlər
agentliyin bağlanması haqqında rəsmi məlumat olmadığını
bildirirlər. Lakin pərdə arxasında holdinqin bağlanması barədə
söhbətlər gəzir.