Xada dərəsində Amerikalı
ər-arvad və onların 4 yaşlı uşaqlarının qətlində ittiham olunan
çoban, 19 yaşlı Malxaz Kobaurinin dediyinə görə, Smit ailəsinin
üzvlərini o, öldürməyib.
Onun Msxeta rayon məhkəməsində bildirdiyinə görə, hadisə yerində
iki xarici vətəndaş olub. Qətli onlar yerinə yetirib və onu da
hədələyiblər.
“Onları mən öldürməmişəm, iki
xarici vətəndaş var idi, onlar öldürüb və məni də hədələyiblər,
qardaş-bacını öldürəcəyik dedilər”, - birinci kanal müttəhimdən
sitat gətirir.
Hal-hazırda Msxeta rayon
məhkəməsi Malxaz Kobauri barəsində həbs qətimkan tədbirinin
seçilməsi məsələsini müzakirə edir. Prokurorluq onun həbs
olunmasını tələb edir.
Malxaz Kobauri Cinayət
Məcəlləsinin 109-cu maddəsinin birinci hissəsinin “q”, ikinci
hissəsinin “b”, 3-cü hissəsinin “a” və “b” altbəndləri ilə nəzərdə
tutulmuş cinayətləri törətməkdə ittiham olunur ki, bu da xüsusi
amansızlıqla, başqa cinayətin gizlədilməsi məqsədilə, əvvəlcədən
bilərək həddi buluğa çatmamış şəxsin və iki nəfərin qəsdən
öldürülməsi deməkdir.
Prokurorluğun məlumatına görə,
istintaq nəticəsində aydın olub ki, 4 iyul tarixində, təxminən saat
11:30 radələrində Duşeti rayonunda yerləşən Xada dərəsində spirtli
içkinin təsiri altında olan Malxaz Kobauri turistlərlə - Rayan
Smit, onun həyat yoldaşı və 4 yaşlı övladı ilə qarşılaşıb. Onlar
dərədə olan şəlalənin yerini göstərməyi xahiş ediblər və Malxaz
Kobauri bununla razılaşıb. Müəyyən məsafə qət etdikdən sonra
şəlalələrdən birinin yaxınlığında münaqişə zəminində acıqlanan
Malxaz Kobauri ov tüfəngindən iki dəfə atəş açmaqla 4 yaşlı övladı
və həyat yoldaşının yanında Rayan Smiti öldürüb. Törətdiyi cinayəti
gizləmək məqsədilə o, Rayan Smitin həyat yoldaşı və azyaşlı uşağını
da öldürmək qərarına gəlir. Qadın xilas olmaq üçün dərə
istiqamətinə qaçıb, bu zaman hündürlükdən yıxılaraq dünyasını
dəyişib. Bundan sonra Malxaz Kobauri 4 yaşlı uşağı da ov
tüfəngindən atəş açaraq qətlə yetirib, cəsədi və gilizləri çaya
atıb, uşağın cəsədini isə onlara məxsus əşyalarla birlikdə hadisə
yerinə yaxın ərazidə olan qar uçqunu altında təbii olaraq yaranmış
mağarada gizlədib və hadisə yerini tərk edib.
Mənbə:
reginfo.ge