Anar Rafiqoğlu birillik fasilədən sonra "Zarafat kolleksiyası 5" ilə qayıdır
24 may tarixində saat 15:30-da Tiflis şəhəridə yerləşən Atoneli
adına teatrda azərbaycanlı gənc aktyor Anar Rafiqoğlunun bir ildən
artıq fasilədən sonra növbəti stand up şousu baş tutacaq.
“Zarafat kolleksiyası 5” adlanan şouda gənc aktyor tamaşaçılara
bir-birindən maraqlı gülüş ssenariləri təqdim etdəcək.
Anar Rafiqoğlu 2012-ci ildən stand up komediya tamaşaları ilə
peşəkar səhnədə çıxış edən, Gürcüstanda bu sahədə fəaliyyət
göstərən yeganə azərbaycanlıdır. Tamaşaya nəyə görə bu qədər ara
verildiyi haqda aktyorun özü Marneuli radiosuna danışdı.
Anarın sözlərinə görə tamaşaların hazırlanması üçün teatr
problemləri var və onlara dəstək olunmadığına görə, ildə ən çoxu
1-2 dəfə stand up şou təşkil edə bilirlər. Anar onu da xatırlatdı
ki, onların yeni təsis etdiyi "ERA TEATRI" onlar üçün yeni imkanlar
yaradacaq.
Aktyor onu da əlavə etdi ki, artıq bir neçə aydır bu tamaşanın
üzərində işləyir və tamaşada məişət yumorları ilə bərabər, xeyli
siyasi, ictimai zarafatlar olacaq, ölkəmizdə və dünyada baş verən
sosial problemlərə toxunulacaq.
“Zarafat kolleksiyası 5” stand up şousunu izləmək üçün biletləri
Tiflisdə fəaliyyət göstərən Mirzə Fətəli Axundov müzeyindən əldə
edə bilərsiz.