"Burada (Sadaxlıda) gəlib kimlərsə nəsə etmək istəyirlərsə, buna bizim bu birlik yol verməz ki, kimlərsə gəlsin burada artıq-əksik hərəkət eləsin" - Bələdiyyə Məclisinin üzvü Rövşən İsgəndərov
17:09 / 25.09.2018
“Bizim kəndimizə gələn bəzi insanlar, bir az
diqqətli olun, burada gəlib kimlərsə nəsə etmək istəyirlərsə, buna
bizim bu birlik yol verməz ki, kimlərsə gəlsin burada artıq-əksik
hərəkət eləsin”.
Bu bəyanatı Marneuli Bələdiyyə Məclisinin üzvü Rövşən İsgəndərov
Sadaxlı gəncləri ilə görüşərkən sosial şəbəkədə canlı yayımda
verib.
Facebook canlı yayımında Rövşən İsgəndərov 23 sentyabr tarixində
Sadaxlı Gənclər Birliyinin ikinci toplantısının keçirilməsindən
söhbət açır. O, Sadaxlıların mərdliyini vurğulayıb və kəndə gələn
qonaqları “bir az diqqətli olmağa”
çağırıb.
İsgəndərov bizimlə söhbəti zamanı bu bəyanatda Sadaxlılardan başqa
heç kəsə toxunulmayıb.
“Mən bunu nəzərdə tutmamışam. İstəyirəm gənclər sağlam
həyat tərzi sürsün. İdmanla məşğul olsunlar. Bunu nəzərdə tutub
demişəm” – deyə Rövşən İsgəndərov bildirdi.
Rövşən İsgəndərovdan “burada gəlib kimlərsə nəsə etmək
istəyirlərsə, buna bizim bu birlik yol verməz ki, kimlərsə gəlsin
burada artıq-əksik hərəkət eləsin” kimi bəyanatının
nəyi nəzərdə tutduğunu aydınlaşdırmasını istədik. O, bildirdi ki,
bu bəyanat kənddə azart oyunların və bu kimi hərəkətlərin aradan
qaldırılması məqsədilə edilib.
Rövşən deyir ki, onun facebook səhifəsi vasitəsilə verdiyi bəyanat
gənclərin sağlam həyat tərzi və idmana marağının artırılması
məqsədilə edilib və “Marneuli” radiosunun jurnalistləri onu düzgün
başa düşməyiblər. Lakin sosial şəbəkəyə yüklənmiş videoda Bələdiyyə
Məclisinin üzvü idmandan danışmayıb.
Marneuli Bələdiyyə Məclisində İsgəndərovla müsahibəmiz zamanı yerli
hökümət orqanının nümayəndələri onun ətrafına toplaşdılar. Marneuli
merinin müavini Laşa Lobjanidze dedi ki, jurnalistlər İsgəndərovun
“sözlərinin üzərinə gedirik”.
Marneuli Bələdiyyə Məclisinin sədri Amiran Qiorqadzenin fikrincə
İsgəndərovun bəyanatı sadəcə pis tərcümə olunub.
“O, demək istəyir ki, pis niyyətlə gedənlər olsa
gənclər buna yol verməyəcəklər. Bu demək deyil ki, Sadaxlıya heç
kimi qoymayacaqlar. Yanaşmadan söhbət gedir. Yəni gənclər pis
niyyətli yanaşmanı yaxşı qarşılamır” – deyə Amiran
Qiorqadze bildirdi.
Beynəlxalq Şəffaflıq Gürcüstanın nümayəndələri Rövşən İsgəndərovun
bəyanatını siyasi adlandırırlar.
Yayılmış videodan Sadaxlı gənclərinin görüşündə yalnız oğlanların
iştirak etdiyi görünür.