Azərbaycan gömrük postunda Gürcüstan vətəndaşının üzərindən narkotik vasitə aşkar edilib
Gürcüstandan Azərbaycana gedən Gürcüstan
vətəndaşının üzərindən narkotik vasitə aşkar olunub.
Hadisə "Mazımçay" gömrük postunda baş
verib.
Bu haqda məlumatı Azərbaycan Dövlət Gömrük Komitəsinin Mətbuat və
İctimaiyyətlə Əlaqələr İdarəsi yayır.
Yayılan məlumatda bildirilir ki, "Gürcüstandan
Azərbaycana gedən Gürcüstan vətəndaşının idarə etdiyi "Scania"
markalı yük avtomobilinə gömrük baxışı keçirilərkən sürücünün
hərəkətləri gömrükçülərdə şübhə yaradıb və onun üzərində şəxsi
yoxlama aparılıb. Yoxlamadan əvvəl vətəndaşa üzərində və ona məxsus
yük maşınında gömrük nəzarətindən gizlədilən və ya bəyan edilməyən
hər hansı predmetin, o cümlədən narkotik vasitənin olub-olmadığı
soruşulub. Vətəndaş isə öz növbəsində üzərində qanunla qadağan
edilən heç bir əşyanın olmadığını bildirib. Lakin yoxlama zamanı
onun əynindəki gödəkçənin cibində olan "Philip morris" markalı
siqaret qutusunda 0.3 qram narkotik vasitə - marixuana
aşkarlanıb".
Faktla bağlı araşdırma aparılır.