Martın 20-də Tbilisidə yerləşən Heydər Əliyev Parkının qarşısında
Novruz bayramı münasibətilə tədbir keçirilib.
Bayram mərasimində Azərbaycanın Gürcüstandakı səfiri Faiq Quliyev,
Tbilisi Şəhər Şurasının sədri Giorgi Tkemaladze, Tbilisi merinin
müavini Kaxa Qulediani, Türkiyə, Qazaxıstan, Türkmənistan və İranın
səfirləri, digər ölkələrin səfirliklərinin nümayəndələri,
Azərbaycanlı İş Adamları Birliyinin sədri Nəriman Qurbanov,
azərbaycanlı icmanın üzvləri, ziyalılar və gənclər iştirak
ediblər.
Azərbaycan, Türkiyə, Qazaxıstan, Türkmənistan və İranın
Gürcüstandakı səfirlikləri Abanotubani küçəsində Novruz bayramı ilə
əlaqədar xüsusi guşə yaradaraq milli-mədəni və incəsənət
nümunələrini, Novruz atributlarını nümayiş etdiriblər.
Tədbir iştirakçıları Azərbaycan guşəsini ziyarət edib və
azərbaycanlıların milli mətbəxinin ləziz təamlarından dadıblar.
Səfir Faiq Quliyev, Gürcüstanın Azərbaycanlı Ağsaqqallar Şurasının
sədri İsak Novruzov, Mirzə Fətəli Axundov adına Azərbaycan
Mədəniyyəti Muzeyinin direktoru Leyla Əliyeva qonaqlara hədiyyələr
təqdim ediblər.
Sonra Novruz tonqalı alovlandırılıb.
Azərbaycan xalçaları, səməni, boyanmış yumurta, şəkərbura, paxlava
və digər şirniyyatlarla bəzədilmiş meydanda Kosa və Keçəl
duzlu-məzəli söhbətləri ilə tədbirə xoş ovqat qatıblar.
Səfir Faiq Quliyev çıxış edərək Novruz bayramı münasibətilə
təbriklərini çatdırıb. O, Azərbaycan xalqının Novruz bayramına
verdiyi böyük dəyərdən danışıb, minilliklər ərzində bu bayramı
sevə-sevə yaşatdığını bildirib. Qeyd edib ki, qədim köklərə malik
bu bayram zəngin adət-ənənələri, bəşəri dəyərləri yaşadır.
Diplomat bildirib ki, Azərbaycanın Birinci vitse-prezidenti
Mehriban xanım Əliyevanın ciddi səyləri nəticəsində Novruz bayramı
UNESCO-nun Bəşəriyyətin qeyri-maddi mədəni irsi üzrə Reprezentativ
siyahısına daxil edilib. Azərbaycanın müstəqilliyi dövründə ilk
dəfədir ki, Novruz bayramı Azərbaycanın bütün ərazilərində -
Xankəndidə, Şuşada, Laçında və işğaldan azad olunmuş digər
rayonlarında da təntənəli şəkildə qeyd olunur. Bu ərazilərdə
yandırılan bayram tonqalları bir daha sönməyəcək.
Səfir vurğulayıb ki, Gürcüstanın bölgələrində də bayram
münasibətilə şənliklər keçirilir. Bu da Gürcüstanda qədim
multikultural ənənələrin yaşadılmasının göstəricisi kimi xüsusi
əhəmiyyət daşıyır.
F.Quliyev Gürcüstan rəsmilərinə azərbaycanlılar üçün əziz olan
bayrama həsr edilən tədbirdə iştirakına görə təşəkkürünü
bildirib.
Tbilisi Şəhər Şurasının sədri Qiorqi Tkemaladze Novruz bayramı
şənliyində iştirakdan qürur duyduğunu qeyd edib. Bildirib ki,
Tbilisi tolerantlığın nümunəsidir, şəhərdə hamı dostluq və
əmin-amanlıq şəraitində yaşayır. Novruz yeni gün deməkdir. Şura
sədri Azərbaycan ilə Gürcüstan arasında mədəni əlaqələrin
inkişafını xüsusi vurğulayıb.
Tbilisi şəhər merinin müavini Kaxa Guledani, Türkiyənin səfiri Ali
Kaan Orbay, Ağsaqqalar Şurasının sədri İsak Novruzov və başqaları
çıxışlarında bayram münasibətilə təbriklərini çatdırıblar.
Bayram tədbiri maraqlı konsert proqramı ilə davam edib.
Abşeron rayon Xırdalan şəhər onbirillik və Lənkəran şəhər
C.Cabbarlı adına Musiqi məktəblərinin, “Ceyran” rəqs ansamblının
kollektivləri, ayrı-ayrı müğənnilər Azərbaycan və gürcü xalq,
bəstəkar mahnılarını, rəqslərini ifa ediblər.
Qeyd edək ki, tədbir Azərbaycan səfirliyinin dəstəyi, Mirzə Fətəli
Axundzadə adına Azərbaycan Mədəniyyəti Muzeyinin və Gürcüstandakı
Azərbaycanlı Ağsaqqalar Şurasının birgə təşkilatçılığı ilə
keçirilib.
Tədbirin iştirakçılarına çay və Novruz təamları təqdim olunub.
Mənbə: azertac.az
Bizi Teleqramda izləyin! Yeni xəbərlər anında kanalda!
Linkə daxil olub
abunə olun!
Bizi WhatsAppda izləyin! Yeni xəbərlər anında kanalda!
Linkə daxil olub
abunə olun!
Digər maraqlı xəbərlər
"Marneuli" radiosunun
Facebook səhifəsində.
Bizi
"Telegram"da
izləyin.
Şahidi olduğunuz hadisələri çəkib bizə göndərin!
+995557994415