Gürcüstanda rəsmi səfərdə olan Azərbaycan respublikasının Diasporla
İş üzrə Dövlət Komitəsinin sədri Fuad Muradovun rəhbərlik etdiyi
nümayəndə heyəti bu gün 13 iyun tarixində Marneuli şəhərində qonaq
oldu.
Görüş Marneulidə yerləşən "Çay Evi"ndə baş tutdu. Marneuliyə səfəri
zamanı Fuad Muradov Gürcüstanda yaşıyan azərbaycanlılarla görüşdü
və onları narahat edən bir çox məsələlər müzakirə edildi.
Görüşdə Azərbaycanın Gürcüstandakı səfiri Dursun Həsənov, SOCAR-ın
Gürcüstan nümayəndəliyinin rəhbəri Mahir Məmmədov, Gürcüstan
parlamentinin deputatları Ruslan Hacıyev, Tamaz Naveriyani, Savalan
Mirzəyev və Mahir Dərziyev, Kvemo Kartli qubernator müavini Zaur
Darğallı, Marneuli merinin müavini Zaur Tabatadze və bələdiyyə
məclisinin üzvləri, diaspora komitəsinin rəsmiləri, Gürcüstanın
müxtəlif bölgələrində yaşayan azərbaycanlı ziyalılar, gənclər və
müxtəlif QHT rəhbərləri iştirak ediblər.
Görüşdə çıxış edən Diasporla İş üzrə Dövlət Komitəsinin sədri
bildirdi ki, Marneuliyə səfər etməkdə onun məqsədi yerli əhalini
narahat edən məsələləri dinləməkdir.
Komitə sədri ölkələrimiz arasında tarixən mövcud olan dostluq
əlaqələrindən söz açıb, soydaşlarımızın bu dostluğun daha da
möhkəmlənməsindəki rolundan danışdı. O, bildirib ki, Gürcüstanda
yaşayan azərbaycanlılar bu ölkənin siyasi, iqtisadi həyatında fəal
rol oynayırlar. Onu da əlavə etdi ki, o əsasən təhsil, mədəniyyət
sahələrində çalışacaq.
Tədbirdə komitə sədri görüş iştirakçılarını dinləyib və fikirlərə,
rəy və təkliflərə cavab verib.
Görüşdə iştirak edən vətəndaşlar bu görüşü müsbət
dəyərləndirdilər.
Komitə sədri Marneulidəki “Çay evi”ndə fəaliyyət göstərən “Marneuli
Gənclər Mərkəzi”nin şahmat kursu, gənc istedadların əl işləri ilə
tanış olub. Bundan başqa, F. Muradov azərbaycanlı gənclərin təhsil
alma imkanları, müasir biliklərə yiyələnmək üçün onlara yaradılan
şəraitlə maraqlanıb. Bir qrup gəncə kompyuterlər hədiyyə
edilib.
F. Muradov əlilliyi olan şəxslərin vəziyyəti ilə maraqlanıb,
onların bir qrupuna müasir tipli əlil arabaları bağışlayıb.
Arabalar Gürcüstan Azərbaycanlılar Əlillər Cəmiyyətinin sədri
Rövşən Əliyevə təqdim edilib.