86 yaşlı Həmail Sarıyeva iki ay bundan əvvəl evinin divarının
bir hissəsi uçduğuna görə kömək tələb edirdi. Həmin vaxt “Marneuli”
radiosu daxil olmaqla bir sıra mətbuat vasitəsi problemi
işıqlandırmışdı.
Ona evinin təmir olunacağı vəd edilmişdi. Hal-hazırda həmin divarın
qalan hissəsi də uçub, lakin Həmailə hələ də heç bir yardım
görtərilməyib.
Biz “Marneuli” radiosu olaraq təkrar Ulaşlı kəndinə getdik və
vəziyyətlə maraqlandıq. Evin indiki vəziyyəti yaşayış üçün olduqca
təhlükəlidir. Həmailin sözlərinə görə, 2 ay əvvəl Gürcüstan
Parlamentinin majoritar deputatı Ruslan Hacıyev onun ziyarətinə
gələrək ona söz verib ki, evin bərpa olunması üçün əlindən gəldiyi
qədər kömək edəcək.
Ziyarətinə gələnlərin və yardım üçün söz verənlərin olmasına
baxmayaraq ona kömək göstərən olmayıb.
Həmailin sözlərinə görə, o, kömək üçün Qasımlı inzibati ərazi
vahidliyinin nümayəndəsinə müraciət edib. İcra nümayəndəsi isə
Ulaşlı kənd sakinlərindən evin təmiri üçün yardım toplamalarını
istəyib.
Evi uçduğundan indi onun işığı da yoxdur və işıqsız evdə yaşamaq
yaşlı qadın üçün daha da çətindir. Həmail çətin şəraitdə tək
yaşamaq məcburiyyətindədir.
O, evinin əvvəlki vəziyyətə qayıtmasını istəyir və aidiyyatı
orqanlardan kömək gözləyir.
Məsələyə aydınlıq gətirmək üçün Ruslan Hacıyevlə əlaqə saxladıq. O,
bizə bildirdi ki, yaxın günlərdə meriya və onun bürosu tərəfindən
evin təmiri üçün lazimi köməklik göstəriləcək.
Qeyd edək ki, Həmailin illər öncə böyük və mehriban ailəsi olub,
sonra yoldaşı dünyasını dəyişib və bundan sonra onun üçün çətin bir
dövr başlayıb. İki oğul və bir qız övladını çətinliklə böyüdüb.
Daha sonra övladının biri xaricə köçüb və orada yaşamağa başlayıb,
digər övladı evlənərək kəndin digər hissəsində yaşayır, qızı isə
ailə quraraq Türkiyəyə köçüb. Hal-hazırda onun övladları və
nəvələrinin olmasına baxmayaraq, 20 ildir ki, evdə tək yaşayır.