Başqa-başqa kəndlərdən gələn üç qız eyni problemlə qarşılaşırlar (VİDEO)
23:03 / 05.02.2019
“Marneuli” radiosunun jurnalisti Pərvin Hacıyeva
səhər efirinin aparıcısıdır. O, tez-tez işə gecikir və buna səbəb
olaraq “avtobusun” olmamasını göstərir.Pərvin Marneuli rayonunun Kirəç Muğanlı kəndində
yaşayır.
Səhər saatlarında ictimai nəqliyyat üçün müəyyən olunmuş vaxtda
avtobus tapa bilmədiyi üçün gözləməli olur, daha sonra isə
alternativ çıxış yolu tapmağa çalışır. Marneuliyə gəlmək üçün
yeganə variantı var – taksi. Taksilər isə onların kəndinə hər vaxt
getmir, əgər sifarişlə tutmaq istəsə, 30 lari ödəməli olur.
Xərcləri bölüşmək üçün başqa sərnişinlər axtarmalı olur maşın
tapmaq üçün qonşu kəndə gedir.
"Canlı efirdir gecikmək olmur, bəzən işə getmək üçün
başqa kəndə getməli oluram. Elə olur ora getməyə də taksi tapa
bilmirəm. İşə gəlmək üçün ya taksi ilə rayona gəlməli oluram ya da
saat 9-a qədər gözləyirəm. Saat 9-da kəntdən çıxan növbəti
avtobusla gəlirəm. Mən gəlib çatana kimi saat 10, 11-in yarısı olur
və bu verilişin bitmə vaxtına təsadüf edir. Evə qayıdanda da işdən
tez çıxmalı oluram ki, avtobus tapa bilim, qayıdanda da çətinliklər
yaşayıram. Avtobusun olmadığı zamanlar qonşu kəndə kimi gəlirəm ya
valideyinim məni gəlib evə aparır ya da başqa bir taksi ilə davam
etməli oluram" - Pərvin Hacıyeva deyir.
Marqarita Miskaryanı da nəqliyyat problemi narahat edir. Pərvindən
fərqli olaraq, o, hətta işi üçün daha çox vaxt lazım gəlsə belə
Marneuliyə cəmi 3 saatlığına gəlməli olur. Onların kəndinə marşrut
taksi isə həftədə üç gün səhər saat 9-dan 12-dək işləyir.
“Marneuli” radiosunun media məktəbi” layihəsində iştirak etmək ona
böyük nəqliyyat xərcləri bahasına başa gəlir. Buna görə də dərslərə
“skayp” ilə qoşulur. Marqarita bir çox şeydən nəqliyyata görə
imtina etməli olur.
"Həftə sonları ancaq 6-cı günlər işləyirlər. O da 9-dan
12-yə kimi işləyirlər. Bazar günü isə heç işləmirlər. Gənclər
ictimai nəqliyyat olmadığından işləmirlər, uşaqlar məktəbə, rəqsə
getmirlər. Mən daha çox taksidən istifadə edirəm, Dəmyədən
Marneuliyə taksilər 10 lariyə aparırlar. Bir nəfər olanda isə 20
lariyə aparırlar" - Marqarita Miskaryan deyir.
Leyla Xixani kənd sakinidir. Məktəb şagirdi olan Leyla, deyir ki,
ictimai nəqliyyat yalnız saat 16:00-dək işləyir. O, fərdi
planlarını marşrut taksilərin qrafikinə uyğunlaşdırmalı olur. Bir
dəfə Marneuli Mədəniyyət Mərkəzində keçirilən tama.ada iştirak
etmək üçün bələdiyyədən nəqliyyat ayrılmasını tələb ediblər. Lakin
həyatın “marşrutkalara” tənzimlənməsi çətindir.
"Mədəni tədbirlər çox vaxt axşam saatlarında olur və
gedə bilmirik. Ona görə də bütün tədbirlərdən uzaq
qalmışıq" - Xixani kənd sakini Leyla deyir.
“Marneuli avtoparkı” MMC-nin direktoru Qiqa Calağonia ictimai
nəqliyyatla bağlı problemin olduğunu təkzib edir. Deyir ki, bütün
avtobuslar qrafikə uyğun hərəkət edir və bizim tərəfimizdən misal
çəkilən hallarla razılaşmır.
Calağoniya kənd əhalisinə ümid vermir və deyir ki, mövcud qrafikdə
dəyişiklik olmayacaq. Bələdiyyə tərəfindən nəqliyyat vasitəslərinin
alınması üçün vəsait də ayrılmayıb, müvafiq olaraq Pərvin,
Marqarita və Leyla gələcəkdə də problemlərin öhdəsindən öz
hesablarına gəlməli olacaqlar.