Gürcüstan Təhsil, Elm, Mədəniyyət və İdman
Nazirliyi müəllimlərin sertifikatlaşdırılmasının yeni metodu və
əməkhaqqı siyasətinə dəyişiklik elan edib.
Müəllimlərin müxtəlif fəaliyyətlər və imtahanlar vasitəsilə kredit
yığdığı sistem dəyişib. Amma necə dəyişdiyi hələ ki məlum
deyil.
Leyla Məmmədova 2010-cu ildən demək olar ki, müəllimlərin bütün
imtahanlarında iştirak edib. O, artıq 45 ildir ki, müəllim işləyir.
Onun fikrincə, imtahanlar vacibdir, lakin bu zaman dövlət
müəllimlərin yaşını və iş təcrübəsini da nəzərə almalıdır. Leyla
fikirləşir ki, sistemin tez dəyişməsi yorucudur.
“Əlbəttə bu çox yorucudur. Mən müəllimlərin öz
kvalifikasiyasını inkişaf etdmirə institutunun olmasının
tərəfdarıyam” – Leyla Məmmədova deyir.
Müəllimlərin sertifikatlaşdırılması pedaqoqların peşə
tənzimləmələri, müəllimlərin peşəkarlığının artırılması, pedaqoqun
nüfuzunun artırılması və ümumtəhsil sisteminin inkişafını nəzərdə
tutur. Pedaqoqların sertifikat imtahanı Gürcüstanda 2010-cu ildən
keçirilir. 2014-cü ilədək imtahanda iştirak etmək könüllü idi,
sonra isə məcburi oldu. Paralel olaraq “kredit sistemi” də mövcud
idi ki, bunun vasitəsilə də müəllimlər peşəkarlıqlarını yalnız
imtahanda iştirak etməklə deyil, eyni zamanda müxtəlif
fəaliyyətlərdə iştirak etməklə artırırdı. Hələlik hazırlanma
prosesində olan sistem dəyişikliyi bu il qüvvəyə minəcək.
Təhsil məsələləri üzrə araşdırmaçı Simon Canaşia hesab edir ki,
islahatların belə tez-tez dəyişməsi işin xeyrinə deyil.
“Əgər bu sistem tez-tez dəyişirsə o zaman müəllimlərdə
elə hiss yaranır ki, bu sistemdə böyük güc sərf etməyə dəymir.
Çünki hər növbəti hakimiyyət və ya təhsil nazirliyi, müəllimlər
mərkəzi ləğv edə bilər” - Simon Canaşia deyir.
Canaşia gözlənilən dəyişikliklərdə problemi imtahanların
müəllimlərin müxtəlif statuslarına bağlı olmasında görür.
“Dörd imtahan olacaq. Hər imtahana görə müəllimə status
veriləcək. Bu problem deyil. İmtahan müəllimin kompetensiyasını
təsdiqləyir kvalifikasiyanı deyil” - Simon Canaşia
deyir.
Təhsil məsələləri üzrə ekspertin dediyinə görə, müəllimlərin mentor
olması status ola bilməz, bu onun funksiyasıdır. Ola bilər ki, gənc
pedaqoq ali təhsil alsın və müvafiq imtahanı verərək mentor müəllim
olsun, lakin onun peşəkarlığı statusu ilə uyğun gəlməsin.
Baxmayaraq ki, imtahanların keçirilmə formatı və
sertifikatlaşdırmanın yeni modeli hələlik məlum deyil, əməkhaqqı
siyasəti isə hələ təsdiq olunmayıb, Simon Canaşia hesab edir ki,
mövcud imtahan sisteminin ləğv olunması yaxşı qərardır.
“Sistemin ləğv edilməsi problem deyil. Əksinə, o sistem
heç bir fayda gətirmirdi. Həm də baha idi. Əlbəttə bunun
alternativinin nə olduğunu da düşünmə lazımdır. Hələ ki, dəqiq heç
nə bilmirik” - Simon Canaşia deyir.
Milli Qiymətləndirmə və İmtahan Mərkəzi əlavə izahat vermir. Təhsil
sistemində islahatlarla bağlı bu gün baş nazir Mamuka Baxtadze də
söhbət açıb. 2018-2019-cu tədris ilində 11-ci və 12-ci sinif
şagirdləri üçün attestat imtahanlarının ləğv olunması da bu
islahatların bir parçasıdır.
Həmçinin, qəbul imtahanları sistemində dəyişikliklərin edilməsi bu
islahatlara aiddir ki, buna əsasən də 2020-ci ildən 3 məcburi fənn
olacaq: Gürcü və xarici dillər, üçüncü isə ali təhsil müəssisəsinin
proqramı ilə belə müəyyənləşəcək: texniki fənlər – riyaziyyat,
humanitar fənlər – tarix.