Marneuli meriyası Saimerlo kənd ictimai
məktəbinin həyətinin abadlaşdırılması və digər müəyyən işlərin
aparılması üçün 80 000 lari ayırıb.
Bu barədə Marneuli merinin səlahiyyətlərini icra edən Zaur
Tabatadze 10 fevral tarixində kənddə keçirilmiş “kənd yığıncağı”nda
məlumat verib. Yığıncaqda müzakirə olunan məsələlərdən biri məhz
məktəbin həyətinin abadlaşdırılması idi. Bu məsələni 22 yanvar
tarixində toplaşanların sayının azlığına görə baş tutmamış birinci
“kənd yığıncağı”nda məktəbin direktoru irəli sürmüşdü.
“İllərdir ki, həyət çox pis vəziyyətdədir və uşaqların
sağlamlığı üçün təhlükə yaradır. Hesab edirik ki, həyətin bərbad
vəziyyətdə olması təhülkəsizlik normalarının pozulmasıdır.
Məktəbimizdə kiçik uşaqlar oxuyur və qaçdıqları zaman yıxılıb
xəsarət ala bilərlər”, – Nino Mtvarelidze deyir.
Mer səlahiyyətlərinin icraçısı yığıncaqda çıxışı zamanı bildirdi
ki, direktorun tələbi əsasında bələdiyyə məktəb üçün məbləğ ayırmaq
qərarına gəlib, buna görə də “kənd yığıncağı”nda məktəb həyətinin
abadlaşdırılması məsələsini müzakirə etməyə ehtiyac olmayıb.
Marneuli meriyasından “Marneuli” radiosuna verilən məlumata görə,
bu mərhələdə tender şərtlərinin hazırlanması prosesi davam
edir.