Marneulidə direktorsuz məktəblər
Marneuli bələdiyyəsinin Candar, Kürtlər, Bəylər, Tsopi, Ağqula, Ağ
körpü və Algeti 2 saylı ictimai məktəblərinin direktorları
yoxdur. İllərdir ki, həmin məktəblərdə nizam-intizam işlərini
direktorun əvəzedicisi həyata keçirir.
Həmin məktəblərdən biri olan Tsopi məktəbinin 4 ildir ki, direktoru
yoxdur. Məktəbi direktor əvəzedicisi Nəbi Ağacanov idarə edir. O,
13 ildir ki, həmin məktəbdə müəllim olaraq çalışır.
Onun sözlərinə görə, 3 il öncə o, Təhsil Nazirliyində məktəb
drektorlarının seçim turunda iştirak edib. Amma ona məlum deyil ki,
hansı səbəbə görə onu məktəb direktoru təyin etməyiblər.
“Üç il bundan qabaq nazirlikdə müsahibədə olmuşam.
Çağırsalar gedəcəyik. Mən özüm müraciət etməmişəm. Resurs Mərkəzdən
CV düzəldirlər, nə vaxt lazım olsa, göndərirlər. Oradan tələb
olunanda” - Nəbi Ağacanov deyir.
Marneuli Təhsil Resurs Mərkəzinin rəhbəri Kənan Ömərov bizimlə
söhbəti zamanı bildirdi ki, məktəblərə direktorun təyin olunması
yalnız təhsil nazirliyinin əmri ilə həyata keçirilir.
“Nazirliyə hər bir informasiya verilib ki, 7 məktəbdə
direktor yoxdur. Əvvələr konkurs yolu ilə idi. İndi də Təhsil
Nazirliyi elan edir, Təhsil Nazirliyinin özləri danışıq, yəni
müsahibə keçirib, o əsasda işçi qəbul edirlər. Təhsil Nazirliyinin
müfafiq əmri ilə təyin olunur məktəb direktorları” -
Kənan Ömərov deyir.
Kvemo Kartli bölgəsinin direktoru olmayan məktəblərdə direktorun
səlahiyyətlərini müəllim və yaxud direktor müavini yerinə yetirir.
Gürcüstan Parlamentin ötən həftə keçirilən sessiyasında Təhsil,
Elm, Mədəniyyət və İdman naziri Mixeil Batiaşvili illik hesabatla
çıxış etdi. Nazirin çıxışı zamanı deputat Savalan Mirzəyev nazirə
sual ünvanlayaraq Kvemo Kartli bölgəsində bir sıra məktəblərdə
direktorun olmadığını bildirdi. Amma nazir deputatın sualını
cavabsız qoyaraq öz çıxışına davam etdi. Məsələyə aydınlıq gətirmək
üçün biz Mirzəyevlə əlaqə saxlamağa çalışdıq. Deputat ölkədə
olmadığı üçün sualmız cavabsız qaldı.
Gürcüstan Parlamentinin deputatı və Gürcüstan Parlamentinin Təhsil
Komitəsinin üzvü Ruslan Hacıyevə müraciət etdik. O, bildirdi ki,
Parlamentin iclasından sonra onlar təhsil naziri ilə görüşüblər.
Məktəb direktorlarının təyin olunması ilə bağlı fikir mübadiləsi
aparıblar və yaxın zamanlarda həmin problemlər öz həllini
tapacaq.
“Sabah da bizim Təhsil Komitəsinin Barjomidə iclası
keçiriləcək. Orada o mövzu ətrafında müzakirələr aparılacaq.
Əllbətdə yaxın zamanlarda həllini tapmaq məcburiyyətindədir. Yenə
deyirə o bizim səlahiyyətmiz xaricindədir bilirsiz. Bizim işimiz
deyil, təhsil nazirlinin işidir bilavasitə. Sadəcə olaraq biz
tərəfində bir fikir səsləndirildi ki, bu gecikmədən həyata
keçirilməlidir. Ona görə ki, məktəbin inkişafına çox təsir
edir” - Ruslan Hacıyev deyir.
Gürcüstan Təhsil, Elm, Mədəniyyət və İdman Nazirliyindən “Marneuli”
radiosuna verilən məlumata görə, məktəblərə direktorların təyin
olunması ilə bağlı məlumatı Təhsil Nazirliyi yayımlayır, bu zaman
direktorluğa namizədlərin müvafiq şəhadətnamələri olmalıdır və
direktor olmaq üçün bir neçə mərhələdən keçməlidirlər. Hal-hazırda
direktoru olmayan məktəblər ola bilsin ki, bu vəziyyətlə
sertifikatlaşma probleminə görə üzləşiblər.
Təhsil Nazirliyi müəllimlərin seçimi müsabiqəsi ilə bağlı bu il də
məlumat yayımlayacaq, lakin bunun nə zaman olacağı dəqiq məlum
deyil.