დაზარალებული ელჩინ ალახვერდიევის ადვოკატი და საქართველოს ახალგაზრდა იურისტთა ასოციაციის წარმომადგენელი ეკატერინე მიდოდაშვილი აცხადებს, რომ ელჩინ ალახვერდიევს მერნეულის მერი და შემთხვევის ადგილზე მყოფი სხვა პირები სექსუალური ძალადობით დაემუქრნენ. 

დაზარალებულის ადვოკატი ასევე განმარტავს რომ ელჩინ ალახვერდიევმა სწორედ ამიტომ მოიხადა სახალხოდ ბოდიში და შარდი დალია.

“ჯგუფური დანაშაულიდან გამომდინარე, რადგან რამდენიმე პიროვნება მონაწილეობდა ამ დანაშაულის ჩადენაში, იყო სექსუალური მუქარაც. მუქარა წამოვიდა იქედან, რომ თუ ბოდიშს არ მოიხდიდა და ამას “ფეისბუქის” პირდაპირი ეთერით არ გაავრცელებდა, მას “ბოთლზე დასვამდნენ”. ასეთი ხასიათის მუქარა იყო ყველა პიროვნების მხრიდან." - განაცხადა ეკატერინე მიდოდაშვილმა.

მარნეულის მერი თემურ აბაზოვი დამამცირებელი და არაადამიანური მოპყრობის ბრალდებითაა დაკავებული რაც 5-დან 10 წლამდე პატიმრობას ითვალისწინებს.

ინციდენტში მონაწილე კიდევ ორი პირის, რამინ ალახვერდიევის და მოქალაქე ე.გ-ს მიმართ საქართველოს სსკ-ს 126-ე მუხლის 11 ნაწილის „ბ“ ქვეპუნქტით არის  წარდგენილი ბრალდება, რაც სასჯელის სახით ითვალისწინებს თავისუფლების აღკვეთას 2 წლამდე ვადით.