ნავერიანების ოჯახმა 2016 წელს 5 974 166 კვ.მ მიწის ნაკვეთები უფასოდ მიიღო
13:59 / 19.09.2018
თამაზ
ნავერიანის მიერ 2017 წლის 31 დეკემბერს გამოქვეყნებულ დეკლარაციაში
ვკითხულობთ, რომ მისმა შვილმა თამარ ნავერიანმა 2016 წელს
უფასოდ 2 559 583 კვ.მ მიწის ნაკვეთი
მიიღო. ნავერიანის ცოლმა ნანა სხირტლაძემ კი ამავე წელს, უფასოდ 2 987
083 კვ.მ მიწის ნაკვეთი. შვილისა და ცოლისაგან განსხვავებით 2016 წელს
უსასყიდლოდ თამაზმა საგრძნობლად ცოტა მიწა მიიღო 427 500 კვ.მ.
2016 წელს ნავერიანების საკუთრებაში გადასული მიწის ნაკვეთების საერთო
ფართობი 5 974 166 კვ.მ-ია.
თამარ ნავერიანს 2015 წელს ჩუქებით 6 479 კვ.მ მიწის ნაკვეთი და 220
კვ.მ საცხოვრებელი სახლი, ხოლო ნავერიანის მეორე შვილს გიორგის 1 501
კვ.მ მიწის ნაკვეთი და 148,6 კვ.მ ბინა გადაეცათ.
ნანა სხირტლაძემ 2013 წელს 5 მიწის ნაკვეთი, საერთო ფართით 11 181
კვ.მ 2 000 ლარად და 2 500 დოლარად შეიძინა.
შესაძლოა ითქვას, რომ თამაზ ნავერიანმა მიწის ნაკვეთი მხოლოდ ორჯერ
2006 და 2007 წლებში იყიდა. 2006 წელს ნაყიდი 10 000 კვ.მ მიწის
ნაკვეთში მან 10 000 ლარი, ხოლო 2007 წელს 500 კვ.მ მიწის ნაკვეთში
3120 ლარი გადაიხადა.
ნავერიანმა 2012 და 2017 წლებში მემკვიდრეობით მესტიაში რამდენიმე
მიწის ნაკვეთი და საცხოვრებელი სახლიც მიიღო. 2017 წელს 7 178 კვ.მ
მიწისნაკვეთი, 2012 წელს კი 4 685 კვ.მ მიწის ნაკვეთი და ორი სახლი
ჯამური ფართით 700 კვ.მ.
როგორც დეკლარაციაში ვკითხულობთ, თამაზ ნავერიანს „ლიბერთი ბანკის“
ანგარიშზე 3819,26 ლარი, ხოლო „საქართველოს ბანკის“ ანგარიშზე 23,09
ლარი აქვს. როგორც ჩანს ნავერიანი ბანკებს არ ენდობა, რადგან ნაღდი
ფულის სახით 15 000 დოლარი და 20 000 ლარი აქვს დეკლარაციაში
მითითებული.
თამაზ ნავერიანი დეპუტატი 2016 წლის საპარლამენტო არჩევნების შემდეგ
გახდა. ის კენჭს მარნეულში იყრიდა. აღსანიშნავია, რომ ნავერიანების
ოჯახს მიწის ნაკვეთების უმრავლესობა უსასყიდლოდ სწორედ 2016 წელს
გადაეცა.
რადიო "მარნეული"