"სახელმწიფო უშიშროების ინტერესი, სოციუმის, უმრავლესობის ინტერესები, ესეთი ტერმინები, ესეთი ცნებები უცხოა დემოკრატიული სახელმწიფოებისათვის“ - გიორგი მშვენიერაძე
სად გადის ზღვარი სახელმწიფოს მიერ ადამიანის პირად ცხოვრებასა და პირად თავისუფლებაში შეჭრის შესახებ? ესაა ერთ-ერთი საკითხი, რომელიც დღეს მარნეულის დემოკრატიული ჩართულობის ცენტრში განიხილეს.

როგორც „საქართველოს დემოკრატიული ინიციატივის“ თავმჯდომარემ გიორგი მშვენიერაძემ ჩვენთან საუბრისას თქვა, ამ საკითხებზე დისკუსიები გარდამავალი დემოკრატიის ქვეყნებში, როგორიც საქართველოა, მნიშვნელოვანია.

„საზოგადოებაც განიცდის დემოკრატიზაციას, საზოგადოებაც ხდება უფრო გახსნილი და ბუნებრივია ერთი მხრივ პატრიარქალური ან ტრადიციული შეხედულებები უპირისპირდება ახალ პროგრესულ იდეებს.“ - ამბობს გიორგი მშვენიერაძე

სამოქალაქო თავისუფლება არის სივრცე, სადაც ადამიანებს აქვთ სრული უფლება იმოქმედონ ისე, როგორც თავად მიაჩნიათ საჭიროდ, მანამ სანამ მათი ქმედება სხვების უფლებებს არ შელახავს.

„ზღვარი ნებისმიერი თავისუფლებისთვის არის სხვების ანალოგიურ თავისუფლებასთან დაპირისპირება. დანარჩენი ზღვარები, რაც ხშირად დამახასიათებელის არადემოკრატიული სახელმწიფოსათვის, როგორიც არის ეგრედწოდებული განზოგადებული სახელმწიფო ინტერესი, განსაკუთრებით სახელმწიფო უშიშროების ინტერესი, სოციუმის, უმრავლესობის ინტერესები, ესეთი ტერმინები, ესეთი ცნებები უცხოა დემოკრატიული სახელმწიფოებისათვის“ - გვეუბნება გიორგი მშვენიერაძე

გიორგი მშვენიერაძე ამბობს, რომ საქართველო დემოკრატიზაციის გზას გადის და ამ ნაწილში მნიშვნელოვან როლს საკონსტიტუციო სასამართლოც ასრულებს. საკონსტიტუციოს გადაწყვეტილებები არაერთგვაროვან აზრს იწვევს საზოგადოებაში და შესაძლოა ითქვას, რომ საზოგადოება ორ ნაწილადაა დაყოფილი პროგრესულად მოაზროვნეებად და მათად ვისაც ცვლილებების ეშინიათ.

„არსებობს ორი მიდგომა, როდესაც ადამიანები თვლიან, რომ თითოეული ადამიანი საკუთარი თავის მესაკუთრე კიარაა, არამედ პირველ რიგში არის საზოგადოების ნაწილი და ის პასუხისმგებელია საზოგადოების წინაშე და არის მეორე ნაწილი ადამიანების რომლებიც თვლიან, რომ ადამიანები პირველ რიგში თავისუფალი არსებები არიან, მათი სხეული, მათი აზროვნება, ათი პიროვნება მათი საკუთრებაა და შემდგომ არიან ისინი ადამიანები როგორ ა ერთიანი საზოგადოების ნაწილი. ბუნებრივია, მომავალი ამ მეორე ნაწილისაა, ხოლო ის რომ უმრავლესობა წყვეტს თუ როგორ იცხოვრებს ერთი ადამიანი ეს წარსულის ნაწილია.“ - ამბობს გიორგი მშვენიერაძე

შეხვედრა მარნეულის დემოკრატიული ჩართულობის ცენტრში დღეს, 9 აგვისტოს გაიმართა, რომლის ორგანიზატორიც „თვითგანვითარების უნივერსიტეტია“.

„თვითგანვითარების უნივერსიტეტის“ პროექტ „აქტიურ მოქალაქეთა სკოლის“ ფარგლებში ამდაგვარი შეხვედრები უკვე რამდენიმე თვეა რაც მიმდინარეობს. პროექტი მიზნად ისახავს ქვემო ქართლის რეგიონში მცხოვრები ეთნიკურად აზერბაიჯანელი ახალგაზრდების მოქალაქეობრივი პასუხისმგებლობის გაზრდასა და გააქტიურებას.

რადო „მარნეული“

Print