“Mameyi adı 3 əsrdir ki, var” – Tədqiqatçının Kirovka (Mameyi) kəndinin adının qaytarılması barədə sübutu (VİDEO/FOTO)
15:24 / 21.11.2022
Rondeli fondunun tədqiqatçısı Aleksandr Kvaxadze Kirovka (Mameyi)
kəndinin keçmiş tarixi köklərə sahib olduğunu və bu kəndin tarixi
kitablarda “Mamay” olaraq qeyd olunduğunu deyir.
Kvaxazde bu barədə “Marneuli” radiosunun efirində yayımlanan
“İcmal” verilişində qonaq olduğu zaman danışıb.
Onun sözlərinə görə, kəndin Mameyi olaraq adlandırılması ilə bağlı
18-ci əsrin əvvəlləri, 19-cu əsrin sonlarına aid qaynaqlar
mövcuddur.
“Qədim gürcü qaynağı İoane Baqrationi yazdığı
qaynaqdır. Kartli-Kaxeti krallığının siyahısı var orada. Bu kitab
gürcü dilindədir və kitabxanada tapmaq mümkündür. Bu kitabda
kəndlərin siyahısı var, Araflı var, Saral və Mamay olaraq yazılmış
adlar var. O vaxtlar feodalizm vaxtları idi və bütün torpaqlar 2-ci
feodala aid idi. Amma kəndin adı Mamay olaraq qeyd olunub. Ona görə
Mamey yox, Mamay yazılıb ki, gürcü dilində “ə” hərfi yoxdur. Misal
üçün Qardabanidə Ağtəhlə və Qaratəhlə kəndləri var, amma gürcü
dilində “Ağtakhlia” və “Ğaratakhlia” olaraq keçib. Sadəcə gürcü
qaynaqlar deyil, rus kitablarında da Mameyi kəndi haqqında yazılıb.
“Akti Kavkazskoyu Arxeoqrafiçeskoyu Kommisiyu” kitabında da
yazılıb. Bu rus imperiyasında 19-cu əsrin ikinci yarısında yazılıb.
Burada Borçalı qəzası var qara hərflərlə yazılmış, orada da Mamey
olaraq qeyd olunub. Orada yazılıb ki, yolun kənarında Sadaxlı,
Faxralı, İmirhəsən, Saral, Mameyi kəndi yerləşir. 18-ci əsrin
sonlarında Qarabağdan feodallarla birlikdə gəliblər. Onlarla
birlikdə ermənilər də gəliblər. Bugünkü Dəmyə və Şaumyan,
Bolnisisdə Kudro kəndinə birlikdə gəliblər. Həmin vaxtlar erməni və
azərbaycanlılar arasında etnik baxımdan seçkilik yox
idi”.
Tədqiqatçı deyir ki, qədim zamanlardan bugünkü günə qədər
Azərbaycanlılar öz yaşadıqları kəndlərin adlarına kəndin hörmətli
insanı, din xadimi və eləcə də digər sayılıb-seçilən insanların
adlarını qoyurlar.
“Alman sənədləri də var, orada da Mamay kəndi qeyd
olunub. Bəziləri bu kəndin adının Qızıl Orda xanı, Mamay xanın
adını daşıdığını deyir. Məncə bu düz deyil. Niyə?! Çünki Azərbaycan
kəndlərinin çoxuna baxarsan, o kəndlərin adları kəndi quranların,
ağsaqqal və ya mollaların, ağa-bəylərin, hörmətli insanların
adlarını daşıyır. İmirhəsən kəndi də kəndi quran adamın adını
daşıyır, Qızılhacılı kəndi orada yaşayan din adamı Səudiyyə
Ərəbistanına həcc ziyarətinə gedir və qayıtdığı zaman ona “Qızıl
adamsan” deyiblər və kənd də bu insanın adını daşıyır. Mamay kəndi
də hansısa hörmətli adamın adına ola bilər. Qarabağda, Şuşada Mamay
məscidi var. Bu da çox maraqlıdır”.
O, bu gün Mamey kəndinin sakinlərinin keçirdikləri etiraz
aksiyalarını, sakinlərin adla bağlı tələbini əsaslı saydığını
bildirir. Kvaxadzenin sözlərinə görə, sakinlər hansı adın olmasını
tələb edirlərsə, dövlət də kəndə həmin adı verməlidir.
“Mameyi adı 3 əsrdir ki, var. Kommunistlərin kəndə Kirovka
adı verməsinə baxmayaraq, sakinlər yenə də buraya Mamey adını
deyirlər. Bu kənd gürcü dilində də çətin deyil. Mamay olaraq
səsləndirə bilərlər. Dostluq və Yaşıl təpə adlarının da kommunist
mənaları var. Məncə bura başqa dövlət deyil, Gürcüstanın kəndi və
100 illərlə yaşayan xalqıdır. Buraya başqa ad vermək düzgün deyil,
xalq nə ad istəyirsə, onu da verməlidirlər. Mamey adının verilməsi
məncə çox gözəl olardı”.
Məlumat üçün bildirək ki, Bələdiyyə Kirovka kəndinin adının
dəyişdirilməsi prosesinə 2022-ci ildən başlayıb. Əvvəlcə kənd
sakinlərinə bir neçə ad təklif ediblər, amma onlar arasında
əhalinin tələb etdiyi “Mameyi” adı olmayıb. Bələdiyyə Məclisinin
2022-ci il 14 noyabr tarixində keçirilən iclasında isə Adların
Verilməsi üzrə Komissiyanın üzvü məlumat verib ki, kəndə niyə
“Mameyi” adını vermək olmaz. Bələdiyyə Məclisinin iclasında İrine
Maçaraşvili bildirib ki, Kirovka sakinlərinin tələb etdiyi ad
tarixi mənbələrdə qeydə alınmayıb. “Mamai” adı ilə bağlı bilgilər
var və bu ad iki tarixi fiqurla əlaqəli ola bilər. Maçaraşvilinin
sözlərinə görə, Mamai Qızıl Orda sərkərdəsi və ya müqəddəsin adı
ilə bağlı ola bilər.
Kirovka kəndinin adının dəyişdirilməsi prosesi indiki mərhələyə
qədər davam etdirilir. Xüsusi hökumət komissiyası kənd əhalisinin
və Marneuli meriyasının təklif etdiyi adların kəndə nə dərəcədə
uyğun olduğunu müəyyən etməlidir. Marneuli meriyası kəndə iki ad
seçib. “Dostluq” – gürcü və azərbaycanlıların dostluğunu əks
etdirən ad və “Yaşıl təpə” – kənddə tarixən inkişaf etmiş
metallurgiyanın nümayiş etdirmək və artefaktları tanıtmaq üçün
seçilmiş ad.