Marneuli yerli özünüidarəsi Marneuli şəhərində, Rustaveli küçəsində
yerləşən Durmuşxan Mağalaşvili adına körpünün bərpa işləri ilə
bağlı tender elan edib.
Körpünün bərpası layihəsinə əsasən, körpünün və körpü altındakı
infrastrukturun qaydaya salınması planlaşdırılır.
“2011-ci ildə Marneuli meriyası tərəfindən tender
vasitəsi ilə estakadada bərpa işləri həyata keçirilib. Ancaq qeyd
olunan bərpa işləri zamanı yalnız piyada cığırlarının,
məhəccərlərin və küçə işıqlarının quraşdırılma işləri aparılıb.
Həmin bərpa işləri çərçivəsində estakadanın hərəkət hissəsində,
deformasiya tikişləri və hidroizolyasiya tənzimləmə işləri həyata
keçirilməyib. Bundan əlavə sonrakı illər ərzində estakadada hərəkət
hissəsi dəfələrlə təmir işləri aparılıb. Bu isə estakadanın onsuz
da ağır olan hərəkət hissəsinin bugünkü vəziyyətini daha da
ağırlaşdırdı. Bundan əlavə, estakadada ikiqat şüşə içlikli nikel
örtüklü metal məhəccərlər quraşdırılıb. Bunun istismarı kifayət
qədər yüksək dəyərlidir və estakadanın altında piyadalar üçün
təhlükəlidir. Çünki estakadada hərəkət edən nəqliyyat vasitələri
tərəfindən yaradılan titrəyişə görə şüşələr dəfələrlə
sınıb”
Layihədə körpü altındakı yolun genişləndirilməsi nəzərdə tutulub.
Bir tərəfdən piyadalar üçün səki olacaq. Eləcə də dəmiryolu
keçidində piyadalar üçün xüsusi daşlar quraşdırılacaq.
Marneuli meriyası Mağalaşvili adına körpünün bərpasını 1 893 840
lariyə planlaşdırır.
Layihə təklifinə görə, tenderdə qalib gələcək şirkət müqavilə
bağlandıqdan 5 ay ərzində işləri həyata keçirməlidir. Layihə
təklifində qeyd olunub ki, körpünün bərpa işləri mərhələli şəkildə
olacaq. Bu halda işlər həyata keçirilən zaman körpüdən istifadə
etmək mümkün olacaq.