Çin Gürcüstan vətəndaşları üçün vizasız rejim tətbiq edib.
Baş nazir İrakli Kobaxidze bu barədə hökumətin iclasında bildirib
və qeyd edib ki, Gürcüstan vətəndaşları Çində 30 gün vizasız qala
biləcəklər.
"Çin Xalq Respublikası Gürcüstan vətəndaşları üçün
vizasız gediş-gəliş rejiminin tətbiqi ilə bağlı qərar qəbul edib.
Gürcüstan vətəndaşları Çində ardıcıl 30 gün qala biləcəklər. Bu,
həmvətənlərimizin gediş-gəlişini asanlaşdıracaq mühüm qərardır.
Bu qərar ötən il Gürcüstan və Çin arasında imzalanmış strateji
tərəfdaşlıq sazişinin daha bir mühüm praktiki nəticəsidir. Mən
Gürcüstan vətəndaşlarını təbrik etmək və bu çox mühüm qərara görə
çinli dostlarımıza, Çin hökumətinə təşəkkür etmək
istəyirəm”, - Kobaxidze bildirib.
Gürcüstan ötən il sentyabrın 11-də Çin vətəndaşları üçün birtərəfli
qaydada vizasız rejim tətbiq edib. Fərmanı o vaxtkı baş nazir
İrakli Qaribaşvili imzalayıb.
"Demək istəyirəm ki, ümumiyyətlə, çinli turistlər dünyada,
Avropada, Amerikada, hər yerdə ən arzuolunan turistlərdən
sayılırlar. Bizim birbaşa reyslərimiz var, bu məsələ ilə bağlı
Çinin baş naziri ilə söhbətim olub", - Qaribaşvili
Çin hökumətinin “səmərəliliyinə” işarə edərək bildirmişdi.