65 gündən artıqdır ki, Marneulidə Nərimanov küçəsi 1 ünvanında
yerləşən yaşayış binasının iki eyvanı uçub. Hadisə nəticəsində iki
qadın həyatını itirmişdi.
26 iyun tarixində qeyd olunan ünvanda yerləşən binanın beşinci
mərtəbəsindəki mənzilin eyvanı uçaraq dördüncü mərtəbəki mənzilin
eyvanının da uçmasına səbəb olmuşdu. Hadisədən sonra Marneuli
meriyası vətəndaşları mehmanxanaya yerləşdirmişdi.
Eyvanları uçmuş binanın vəziyyətini Levan Samxarauli adına Milli
Məhkəmə Tibbi Ekspertiza Bürosu araşdırıb. Onların gəldiyi nəticəyə
görə, binada bərkitmə-gücləndirmə işlərinin aparılmasına ehtiyacı
var. Buna baxmayaraq, bina sakinləri yenidən öz mənzillərinə
qayıdıblar.
Akif Bayramovun anası eyvanların uçması nəticəsində dünyasını
dəyişib. O, qeyd edir ki, bədbəxt hadisə zamanı evdə olub.
“Mən işdən qayıdanda təxminən saat səkkizə iyirmi
dəqiqə işləmişdi. Paltarımı soyundum və şortik geyindim. Anam
paltarı sərmək üçün eyvana çıxdı. Mən isə mətbəxdə idim, su içmək
istəyirdim və səs eşitdim. Yuxarıda qonşu qız var idi, bir ailə
kimi idik və onun səsini eşitdim. Gözümü açanda artıq gördüm ki,
qız yerə yıxılıb, onda anamı ümumiyyətlə görmədim. İndi də
düşünürəm ki, ola bilsin yuxudur. Meriyadan başsağlığına
gəlmişdilər, ondan sonra gəlməyiblər. Bir dəfə gəldilər, eyvanı,
evi yoxladılar, nə isə yazıb dedilər ki, bir aya təmirə
başlayacaqlar. Artıq iki ay keçib, ancaq işlərə
başlanılmayıb”.
Akif bildirdi ki, bina təcili surətdə təmir olunmalıdır. Çünki
eyvanlardan başqa zirzəmi, pilləkənlər və dam örtüyü də pis
vəziyyətdədir.
“Dedilər ki, eyvan qəzalı vəziyyətdədir və heç kim
bayıra çıxmasın. Təmir olunana qədər heç kəs çıxmasın. Zirzəmi və
dam örtüyü pis vəziyyətdədir. Dam örtüyündə də problemlər var idi.
Beşinci mərtəbənin sakinləri deyirdilər ki, su damır və ona da
təmir lazımdır. İndi mərtəbələr də çox pis vəziyyətdədir. Biz də
çıxılmaz vəziyyətdə qalmışıq. Bilmirik nə olacaq. Hər gün bu
pilləkənlərlə çıxıb-düşürük. Ancaq biz də qorxuruq”,
– Akif Məmmədov bildirdi.
Həvva Məsiyeva da Nərimanov 1 ünvanında yerləşən binada yaşayır.
Təqaüdçü qadın bizimlə söhbəti zamanı bildirdi ki, eyvanlar
uçduqdan sonra ailələri mehmanxanaya yerləşdiriblər, amma bir neçə
həftə gözlədikdən sonra özləri qəzalı vəziyyətdə olan evə qayıtmağa
qərar veriblər.
“Təxminən iki ay burada qaldıq. Yaxşı baxırdılar, yemək
də verirdilər. Yemək evdəki kimi deyildi, amma minnətdaram ki, nə
lazımdırsa, verdilər. Yaxşı otaqlar idi. İki aydan sonra özümüz,
güclə evə qayıtdıq. Çünki hər şeyimiz buradadır. Geyim və
əşyalarımız mehmanxanada deyildi, uşaqlar da məktəbə getməli idilər
və ona görə gəldik. Mer dedi ki, sentyabrdan başlayacaqlar. Dam
örtüyünü, eyvanları təmir edəcəklər. Amma hələ heç kim gəlməyib və
necə yaşadığımızı soruşan yoxdur. Ən əsası odur ki, dam örtüyü və
eyvanlar təcili surətdə düzəldilməlidir. Qış gəlir, soyuq və yağış
olacaq, baxın, eyvanlar necə pis vəziyyətdədir. Bayırda oturmağa
qorxuruq, yuxarıdan daşlar tökülür”, – Həvva Məsiyeva
bildirir.
Marneuli merinin müavini Roin Dekanoidze “Marneuli” radiosu ilə
söhbəti zamanı bildirdi ki, meriya Nərimanov 1 ünvanındakı binanın
əsaslı təmir olunmasına qərar verməyib. O, bildirdi ki, binanın
zirzəmi, pilləkən, dam örtüyü, eyvanlar və fasadında işlər
planlaşdırılır.
Dekanoidzenin sözlərinə görə, işlərin həyata keçirilməsi üçün
tender yaxın gələcəkdə elan olunacaq. Bunun nəticəsində Nərimanov 1
ünvanındakı binanın təmirinin nə zaman başa çatacağı məlum olacaq.
Ona qədər isə sakinlər yenə eyvansız və pilləkənlərin uçması
qorxusu altında yaşamağa davam edəcəklər.