Tbilisi meri Kaxa Kaladzenin sözlərinə görə, evsiz heyvanların
problemi böyük problemdir, lakin bu, yalnız bələdiyyə səviyyəsində
həll edilə bilməz və buna görə də parlamentin hazırda üzərində
işlədiyi qanun layihəsinin qəbul edilməsi vacibdir.
Kaladzenin sözlərinə görə, heyvanların monitorinqi agentliyi də
qanun layihəsinin hazırlanmasında iştirak edir və onun vasitəsilə
onlar evsiz heyvanların saxlanması və sayının daha effektiv idarə
edilməsinə nail olacaqlar. Bələdiyyə də öz tərəfdən bu istiqamətdə
paytaxt büdcəsindən müvafiq məbləğ ayırmağa hazırdır.
“Mən başa düşürəm ki, bu, ciddi çağırışdır, lakin bir daha qeyd
etmək istəyirəm ki, bütün bunlar qanunvericilik səviyyəsində
tənzimlənməsə və çərçivəyə daxil edilməsə, heç bir layihəni həyata
keçirmək mümkün olmayacaq.
Ona görə də mən çox şadam ki, qanun layihəsi üzərində iş gedir və
bütün maraqlı tərəflərin müzakirədə iştirak etmək imkanı olacaq.
Bizim tərəfimizdən bələdiyyə pul ayırmağa hazırdır ki, problemin
həlli üçün konkret addımlar atılsın”, - Kaladze
bildirib.
Kaladzenin sözlərinə görə, qanun layihəsində heyvanların
populyasiyasının idarə olunması üçün mühüm məsələlər var.
Heyvanların yetişdirilməsi, onların uçot-qeydiyyatı, sahibləri
tərəfindən heyvanların tərk edilməsi, heyvan döyüşlərinin qadağan
edilməsi və s.
“Vacib məsələlərdən biri kimi biz heyvanların izlənməsi
istiqamətində innovativ yanaşmanı qeyd edə bilərik ki, bu da
heyvanların tərk edilməsini və onların nəzarətsiz çoxalmasını
mümkün qədər istisna edir.
Qanun layihəsi heyvanlarla düzgün rəftar edilmədikdə, habelə heyvan
sahibinin zəruri təhlükəsizlik normalarına etinasız yanaşması
nəticəsində üçüncü şəxsə zərər vurduqda müvafiq cinayət və
inzibati-hüquqi məsuliyyəti nəzərdə tutur”, - deyə
Kaxa Kaladze bildirib.