“Çox yorğun olan zaman çəkirəm” –
Marneulili Xəyalə Mustafayeva üçün rəsm mənəvi rahatlığın ən yaxşı
vasitələrindən biridir.
Rəsm çəkməyi özü-özünə öyrənən rəssam özündə yaradıcılıq bacarığını
uşaq yaşlarından kəşf edib. İki il əvvəl, pandemiya dövründə ona
hədiyyə edilmiş boyalarla, kosmetika fırçaları ilə işləməyə
başlayıb və kətan üzərində rəsmlər çəkib. Xəyalə Mustafayeva
Marneuli şəhər 8 saylı ictimai məktəbində Tətbiqi və Təsviri
İncəsənət müəllimi işləyir. Sevimli hobbisindən isə işində fəal
olaraq istifadə edir.
“Kətanda çəkməyə başlayana qədər,
uşaqlıqdan kağız üzərində işləyirdim. Kətan üzərində təxminən 50
rəsmim var. Gah yağlı boya ilə, gah akrillə, gah da akvarellə
çəkirəm. İki il əvvəl Azərbaycan səfirliyi rəsm sərgisi keçirmişdi
(müsabiqə), orada diplom aldım, mənə rəsm üçün yağlı boyalar
hədiyyə etdilər, kətanda ilk rəsmimi ondan sonra çəkdim. Pandemiya
zamanı Tbilisiyə gedə bilmirdim, kosmetika fırçaları ilə
çəkirdim”.
Rəssamın rəsmlərində çoxlu nar görə bilərsiniz. Özünün dediyinə
görə, ən çox nar çəkməyi sevir.
Xəyalə Mustafayeva ilk fərdi sərgisini Mirzə Fətəli Axundov adına
Azərbaycan Mədəniyyət Muzeyində bir neçə ay əvvəl keçirib. Sərgidə
onun rəsmlərini ilk dəfə satmaq imkanı olub.
“Nar çəkəndə məni sakitləşdirir. Rəngli şeyləri
sevirəm. Bir neçə ay əvvəl şagirdlərim sərgimə gəlmişdilər və o
qədər motivasiya alıblar, həmişə deyirlər, müəllim, biz də rəssam
olmaq istəyirik. Məktəbdə elə ürəklə işləyirlər ki, bilmirəm. Çox
istəyirəm, özümün rəssamlıq üçün məkanım olsun, uşaqlarla daha
geniş şəkildə işləyim”.
Özü-özünə öyrənən rəssam gələcək planlarını yerli səviyyədə rəsm
akademiyası yaratmaq və Marneulidə fərdi sərgisini keçirməklə
əlaqələndirir.