“Salam” platforması 14 noyabr tarixində Marneuli Bələdiyyə
Məclisinin iclasında Adların Verilməsi Üzrə Komissiyanın üzvü İrine
Maçaraşvili tərəfindən Kirovka kəndinə adın verilməsi ilə bağlı
bəyanatı dezinformasiya adlandırıb.
“Bir neçə həftə bundan əvvəl “Salam” platforması olaraq
görüşdə iştirak edirdik və həmin görüşdə Marneuli bələdiyyəsinin
yerli özünüidarə nümayəndələri də iştirak edirdilər. Eləcə də
komissiyada olan elmi qrup da orada idi. Həmin qrup nümayəndələri
Kirovka kəndinə adın verilməsi məsələsi ilə bağlı aparılan iş
prosesində işləyən müxtəlif universitetləri, araşdırma və elmi
institutları təmsil edirlər. Bu görüşə əsasən, bildiririk ki, xanım
İrine Maçaraşvilinin Rəşan Ziyadəliyevin sualına cavabı
dezinformasiya və yalan idi. Niyə belə düşündüyümüzü açıqlamağa
çalışacağıq”.
Bələdiyyə Məclisinin iclasında İrine Maçaraşvili bildirdi ki,
Kirovka sakinlərinin tələb etdiyi “Mameyi” adı tarixi mənbələrdə
qeydə alınmayıb. “Mamai” adı ilə bağlı bilgilər var. Ancaq bu ad
iki tarixi fiqurla əlaqədar ola bilər. Maçaraşvilinin sözlərinə
görə, Mamai Qızıl Orda sərkərdəsi və ya müqəddəs şəxsin adı ilə
əlaqədar ola bilər. “Salam” platforması məhz bu məlumatı
dezinformasiya adlandırır.
Birincisi, Adların Verilməsi üzrə Komissiyasının üzvləri, müxtəlif
institutlardan və universitetlərdən olan alimlər dəqiq, sübutlu
şəkildə bildirdilər ki, Mamai adının Qızıl Orda sərkərdəsi ilə
əlaqəli olması mümkün deyil. Bu elmi işçilərin və araşdırmaçıların
mövqeyi idi. Bələdiyyə tərəfindən bunun bir daha bu formada təkrar
olunması problemlidir, ictimaiyyəti səhv yola yönləndirmək və
dezinformasiyadır.
İkincisi, alimlər və araşdırmaçılar meriya nümayəndələri ilə,
bizimlə söhbətləri zamanı bildirdilər ki, bu ad müqəddəs Mamai ilə
əlaqədar ola bilər. Ancaq onların fikrincə, bu da az güman
ediləndir. Bu sadəcə ehtimaldır və alimlər tərəfindən təsdiqlənmir.
Müvafiq olaraq, həmin arqumentin özünüidarə tərəfindən təkrar
olunması manipulyasiyadır, həqiqətə uyğun deyil.
Bələdiyyənin Mameyi ilə əlaqədar rəsmi mövqeyi budur ki, tarixi
mənbələrdə bu formada ad qarşımıza çıxmır və tarixən bu Mamaidir.
Buradan irəli gələrək, bələdiyyə bildirir ki, kəndə Mameyi (bir
hərf fərqinə görə) adı verilə bilməz. Ancaq bələdiyyə mərkəzi
hakimiyyətə rəsmi versiya olaraq “Dostluq” adını göndərib. Bu ad da
heç vaxt tarixi mənbələrdə olmayıb. Əgər nəzərə alsaq ki,
Azərbaycan dilində olan Ə hərfi gürcü dilinə “e” kimi və eləcə də
“a” kimi tərcümə oluna bilər, ola bilsin, şifahi formada “e” və “a”
səsləri bir-birini əvəz edərək istifadə edilsin”, – “Salam”
platformasının bəyanatında qeyd olunub.
“Salam”-ın açıqlamasına görə, təşkilat Kirovka sakinləri ilə
birlikdə artıq neçə aydır əhalinin səsini yerli özünüidarəyə
çatdırmağa çalışır. Məlumata əsasən, təşkilat artıq uzun zamandır
kənddə ümumi kənd toplantısı keçirməyə çalışır. Həmin görüşdə əhali
kəndə adın verilməsi məsələsini müzakirə edəcək, amma yerli
özünüidarə onlara kənd toplantısını qanun çərçivəsində, hüquqi,
ədalətli olaraq keçirmək üçün lazımı sənədi vermir.
“Bir daha Marneuli bələdiyyəsini bizim rəsmi
müraciətimizə cavab verməyə və kənd toplantısı keçirmək üçün lazımi
sənəd verməyə çağırırıq. Əks halda, biz yenə də adın verilməsi ilə
bağlı ümumi toplantı keçirməyi planlaşdırırıq. Bir daha qeyd etmək
istəyirik ki, kənd əhalisi Mameyi adını seçir. Bu adın əhalinin
istəyi olduğu və bunun hansısa neqativ kontekstdə olan şəxslərin
adları ilə əlaqədar olmasının təsdiqlənməməsi halında, yerli
əhalinin istəyinə biganə qalmaq yolverilməzdir. Həmçinin, belə adı
olan neqativ tarixi və ya uydurulmuş şəxslərin mənfi arqument
olaraq gətirilməsi, bizim qiymətləndirməmizə görə, yerli əhalinin
hüquqlarının kobud şəkildə pozulmasıdır”.
“Salam” platforması bələdiyyəni, mərkəzi hakimiyyəti, elmi
işçiləri, beynəlxalq təşkilatları, hüquq müdafiə təşkilatlarını və
başqa icma fəallarını bu məsələ ilə maraqlanmağa, bələdiyyəyə bəzi
əməkdaşların bu məsələni manipulyasiya etmək və ya dezinformasiya
yaymaq imkanını verməməyə çağırırıq”.
Meriyadan nə bildiriblər:
Kəndlərə Adlarının Verilməsi üzrə Komissiyanın üzvü İrine
Maçaraşvilinin Kirovka kəndinə “Mameyi” adının verilməməsi ilə
bağlı açıqlaması.
“Bu məsələ ilə bağlı iş davam edir. Biz Coğrafiya İnstitutunu,
İvane Cavaxişvili adına Dövlət Universitetinin nümayəndələrini
qoşmuşuq, arxiv materiallarını da araşdırırıq, müvafiq olaraq
prosedurlara riayət edərək bu məsələ araşdırıldı, əhali ilə görüş
keçirildi. Xatırlatdığım kimi, burada qədim dəmir metallurgiya
mərkəzi var, eləcə də bizim gürcü-azərbaycan dostluğunu qeyd etmək
üçün bir versiyamız var idi – kəndi dostluq adlandırmaq. Köhnə
adlar, Riğispiri və Vaziskide adıdır, müvafiq olaraq, bir neçə
versiya təqdim olunmuşdu. Onlar arasında fəaliyyət göstərən hökumət
komissiyasında qərar qəbul etmək üçün dostluq da təqdim olunub.
Güman ki, növbəti iclaslarda qərar qəbul olunacaq və bu məsələ ilə
bağlı məlumat alacağıq. Kənd əhalisi tərəfindən təqdim olunmuş
Mameyi adı heç yerdə qeydə alınmır, biz tarixi materialları
araşdırdıq. Mameyi toponimi nə 19-cu, nə də 20-ci əsrdə qeydə
alınmayıb. Ona görə də bizim bu adı vermək səlahiyyətimiz yoxdur.
Bu kəndin müəyyən qədər Mamayi adlandırılmasından irəli gələrək,
Mameyi adında iki versiya var, bir versiya xristian müqəddəsi
Mamaiyə bağlanır, digər versiya isə güman ki, Qızıl Ordanın
sərkərdəsi Mamai ilə əlaqədardır. Bu versiyalar da az qəbul
olunandır və niyə Qızıl Orda sərkərdəsinin, müqəddəsin adı kəndə
verilə bilməz. Çünki biz orada yaşayan əhalinin inancını nəzərə
alırıq. Buna görə də sonrakı adlarla bağlı qərar qəbul etməyimiz
daha doğru olar. Biri dostluq – indiki dövrdə millətlər arasında
sakit, bərabər yaşam nümunəsi, həm də turizmin tanıdılması üçün,
eləcə də biz bilirik ki, burada çox sayda qədim artefakt
aşkarlanıb. Bildiyiniz kimi Yaşıl Təpə unikaldır. Çünki burada
dəmir metallurgiya mağaraları tapılıb. Həmin artefaktı tanıtmaq
üçün bu kəndə dostluq və ya Yaşıl Təpə adı vermək çox yaxşı
olardı”, – İrine Maçaraşvili bildirdi.
Kəndlərə adların verilməsi prosesi Marneuli bələdiyyəsində 2022-ci
ildən başlayıb. Bələdiyyə Sovet İttifaqı ilə əlaqəsi olan bütün
kənd və küçə adlarının dəyişdirilməsinə çalışır.