საქართველოს მასშტაბით სულ 207 არაქართულენოვანი საჯარო სკოლა ფუნქციონირებს. ინფორმაციის თავისუფლების განვითარების ინსტიტუტის (IDFI) მიერ გამოქვეყნებული განათლების სექტორის მიმოხილვის მიხედვით, რომელიც ეთნიკური უმცირესობების და სოციალურად მოწყვლადი ჯგუფების გამოწვევების იდენტიფიცირებას ახდენს, 2021-2022 წელს არაქართულენოვანი სკოლები საქართველოს საჯარო სკოლების 10%-ს შეადგენს.

„საქართველოში ფუნქციონირებს 117 სომხურენოვანი, 79 აზერბაიჯანულენოვანი, და 11 რუსულენოვანი სკოლა, რაც არაქართულენოვანი სკოლების 57%-ს, 38%-ს და 5%-ს შეადგენს, შესაბამისად“. - აღნიშნულია განათლების სექტორის მიმოხილვაში

მიუხედავად იმისა, რომ სომხურენოვანი სკოლების რაოდენობა აზერბაიჯანულ და რუსულენოვანი სკოლების რაოდენობას აღემატება, სომხურენოვან მოსწავლეთა რაოდენობა აზერბაიჯანულ და რუსულენოვან მოსწავლეთა რაოდენობაზე მცირეა. 2021-2022 წელს არაქართულენოვანი მოსწავლეების რაოდენობა 54 325 იყო, რაც საქართველოში მოსწავლეთა რაოდენობის 9%-ს შეადგენს.

54 325 არაქართული მოსწავლის 47.7% აზერბაიჯანულენოვანი, 26.5% რუსულენოვანი, ხოლო 24.5% სომხურენოვანია.

რადიო „მარნეული“