Türkiyə Prezidenti Rəcəb Tayyib Ərdoğan Tbilisiyə rəsmi səfər
edəcək.
Məlumatı Türkiyənin Gürcüstandakı səfiri Fatma Ceren Yazqana
əsaslanaraq "İctimai Yayımçı" dərc edib.
Onun sözlərinə görə, Türkiyə tərəfi Türkiyə prezidentinin səfəri
tarixi barədə Gürcüstan hökumətindən razılaşma gözləyir.
Səfirin sözlərinə görə, Ərdoğan ölkəyə yazda gəlməli idi, ancaq
pandemiya səbəbindən gəlişi müvəqqəti təxirə salınıb.
“Prezident Ərdoğan yazda Gürcüstana səfər etməli idi,
ancaq pandemiya başladı və hər şey bağlandı. İndi tarixdə
razılaşmağa çalışırıq, Gürcüstan hökumətini və onların qrafikini
gözləyirik. Bu görüşün nə vaxt keçiriləcəyini bilmirəm, ancaq
ölkəmin prezidenti Gürcüstana nə qədər tez gələrsə, o qədər çox
şərəf duyaram, çünki bizim ölkələrimiz arasında strateji əməkdaşlıq
davam edir. Ərdoğan media ilə görüşdə Gürcüstana səfər edəcəyini
deyib, amma hələ tarix razılaşdırılmalıdır. Ümid edirəm ki, bu
tezliklə baş verəcək”, – deyə Fatma Ceren Yazqan
bildirib.
“Ümumiyyətlə, Gürcüstan-Türkiyə strateji tərəfdaşlığı nəzərə
alınmaqla, yüksək səviyyəli səfərlər hər zaman prioritetdir və
prezidentlər, hökumət başçıları və nazirlərin səfərləri, həmçinin,
Gürcüstan-Türk Strateji Şurasının iclası da daxil olmaqla bu
istiqamətdə işlər aparılır.
"Xüsusilə Prezident Ərdoğanın səfərinə gəlincə, daha
əvvəl də qeyd etdiyimiz kimi, yüksək səviyyəli səfərlər hər zaman
prioritetdir, lakin baş tutacağı dəqiq vaxt, tarix məlum
deyil", – deyə Xarici İşlər Nazirliyi "Netgazeti"-yə
göndərdiyi məktubda bildirib.