Gürcüstan prezidenti Qiorqi Ruruanı əvf edib
Gürcüstan Prezidenti Salome Zurabişvili müxalif lider Qiorqi
Ruruanın əfvi barədə fərman imzalayıb.
Dövlət başçısı bununla bağlı sərəncam imzalayıb.
“Mən razılaşmanın birinci mərhələsinin yerinə
yetirilməsini alqışlayıram. Öz tərəfimdən sözümü tutaraq əfv
fərmanını imzaladım”, - deyə Gürcüstan Prezidenti
qeyd edib.
Prezidentin Q.Ruruanı əfv etməsi üçün irəli sürdüyü şərti artıq
yerinə yetirilib. Belə ki, parlamentə seçilən və iqtidarla siyasi
böhrandan çıxış planını imzalamış müxalifət təmsilçiləri bu gündən
qanunverici orqanın fəaliyyətində iştirak etməyə başlayıb.
Qanunverici orqana daxil olan müxalif deputatların hazırkı sayı 13
nəfər təşkil edir.
Xatırladaq ki, Q. Ruruanın həbsdən azad edilməsi müxalifətin dialoq
prosesində hakimiyyət qarşısındakı əsas tələblərindən biri idi.
Gürcüstanın müxalif “Mtavari arxi” telekanalının səhmdarlarından
biri - iş adamı Q. Rurua 2019-cu ilin 18 noyabrında odlu silahların
qanunsuz əldə edilməsi, saxlanılması və daşınması ittihamı ilə
saxlanılıb. O, 30 iyul 2020-ci il tarixində Tbilisi Şəhər
Məhkəməsinin qərarına əsasən 4 il müddətinə məhkum edilib. Q. Rurua
müxalifyönlü “Mtavari Arxi” telekanalın əsas hissədarlarından
biridir.