Palçıqdan ağırlaşmış “qaloşlarla” məktəbə doğru – palçıqlı yolun hərəkəti məhdudlaşdırdığı kənd
17:48 / 21.04.2021
Xutor-Lejbəddin Marneulidən təxminən 25 kilometr məsafədə yerləşir.
Kənd bir əsrdən artıqdır ki, mövcuddur. Ancaq sakinlər üçün su
problemi kəndin sıradan çıxmış yol problemi qədər ciddidir.
Yağış yağan zaman vəziyyət daha da ağırlaşır. Vəkil Səfərov
övladları ilə birlikdə məktəbə gedir, rezin ayaqqabı geyinir, kiçik
qızını qucağına alır və yoluna davam edir. Vəkil bildirir ki,
illərdir yerli özünüidarədən yolun təmir edilməsini tələb
edirlər.
Kənddə su da yoxdur. Bunu bütün ailələrdə əl-üz yuyan olması da
təsdiq edir. İçməli su götürmək üçün özləri alternativ yol
düşünüblər və kustar qaydada bulaq düzəldiblər. Suyun içmək üçün nə
dərəcədə yararlı olması barədə məlumatları yoxdur. Bulaqdan içməli
su gətirirlər. Əşyalarını yumaq və çimmək üçün arx suyundan
istifadə edirlər.
Yerli özünüidarədən bildirirlər ki, yolun təmiri baxımından
Xutor-Lejbəddində bu il heç nə planlaşdırılmır. Suyun təmiri isə
yaxın gələcəkdə planlaşdırılır.
“Xutor Lejbəddinin əhalisi kəndə gedən yolun təmirini
tələb edirdi. Bunu 2020-ci ildə təmir etdik. Hazırda içməli suyun
layihələşdirilməsi üçün tender elan olunub. Tender başa çatıb və
qalib şirkət var. Təxminən 22 may tarixində layihəni təhvil
verəcəklər və sonra işlərin həyata keçirilməsi üçün tender elan
olunacaq. Bundan sonra gələn il üçün daxili yollara asfalt qatının
çəkilməsinin qayğısına qalacağıq”, – Meriyanın
İnfrastrukturun İnkişafı, Analiz və Monitorinq Şöbəsinin rəhbər
müavini Davit Mumladze bildirdi.
Davit Mumladzenin sözlərinə görə, müvəqqəti yeganə alternativ yola
çınqıl tökülməsi ola bilər. Bu isə kənddə su infrastrukturunun
tikinti işləri üçün tender elan olunana qədər həyata
keçiriləcək.