Azərbaycanın paytaxtına rəsmi səfərə gedən Tbilisi Meri Kaxa
Kaladze, Azərbaycan Prezidenti İlham Əliyevlə görüşüb. Məlumatı
Tbilisi meriyası və Azərbaycan mətbuatı yayıb.
Tbilisi meriyasından verilən məlumata görə, görüşdə Gürcüstan ilə
Azərbaycan arasındakı münasibətlər və strateji əməkdaşlıq
məsələləri müzakirə olunub.
“Əhəmiyyətli bir razılaşma imzalandı. Bakı və Tbilisi
bu gündən qardaş şəhərlərdir, lakin iki ölkə həmişə qardaşlıq və
dostluq münasibətlərində olublar. Azərbaycan şəxsən mənim üçün dost
bir ölkədir, burada çox dostlarım var. Energetika naziri olaraq
paytaxtınıza tez-tez baş çəkmişəm və gördüyüm kimi gündən-günə Bakı
gözəlləşir. Mükəmməl qonaqpərvərliyə görə sizə təşəkkür etmək
istəyirəm", - deyə Kaxa Kaladze bildirib.
Meriyadan verilən məlumata görə, görüşdə Azərbaycan Prezidenti
İlham Əliyev Bakı ilə Tbilisi arasındakı qardaşlığın əhəmiyyətindən
danışıb və Kaxa Kaladzenin Gürcüstan ilə Azərbaycan arasındakı
münasibətlərin möhkəmləndirilməsində şəxsi töhfəsini qeyd edib.
"Azərbaycana xoş gəlmisiniz. Bilirəm ki, dünən Bakı ilə
Tbilisi qardaşlaşlığına dair çox vacib bir müqavilə imzaladınız.
Ölkələrimiz, xalqlarımız arasında həmişə qardaşlıq münasibətləri
olub və bu dəfə paytaxtlarımızın qardaşlaşması qardaşlığımızın
təbii davamıdır. Dünyada çox gözəl şəhərlər var, lakin Bakı və
Tbilisi tarixi abidələrə böyük diqqət yetirilərək, özünəməxsus
gözəlliyi və mədəniyyəti ilə seçilir. Bilirəm ki, siz Tbilisinin
daha da yaxşılaşdırılması üçün, eləcə də Azərbaycan ilə Gürcüstan
arasındakı münasibətlərin inkişafı üçün çox səy
göstərirsiniz", - deyə İlham Əliyev bildirib.