Mülki fəal Samirə Bayramova Marneuli Bələdiyyə Məclisinin sədri Amiran Qiorqadzeyə açıq məktubla müraciət edib.
Məktub Marneulidə azyaşlıya qarşı etnik zəmind baş vermiş zorakılıq faktına aiddir. Hadisənin iştirakçılarından biri Bələdiyyə Məclisi sədrinin müavini Riçard Qiqaninin oğlu, həm də bələdiyyənin əməkdaşı Mamuka Qiqani olub.

Bayramovanın sözlərinə görə, bu hadisə təkcə zorakılıq və qanun pozuntusu deyil, həm də Marneuli yerli idarəçiliyində ailəvi maraqların üstün tutulmasının, məsələni ört-basdır etmə cəhdlərinin göstəricisidir. Mülki fəal Bələdiyyə Məclisi sədrindən prinsipial mövqe nümayiş etdirməyi, məsul şəxslərin vəzifədən uzaqlaşdırılmasını və cəmiyyətin etimadının bərpası üçün konkret addımlar atmağı tələb edir.

"Marneuli Bələdiyyə sədrinə açıq məktub!
Hörmətli Amiran bəy, Amiran Giorgadze Sizin müavinlərinizdən biri olan cənab Riçard Qiganinin övladının Marneulidə azyaşlıya qarşı zorakı hərəkətləri və etnik-milli zəmində nümayiş etdirdiyi davranış yalnız səhv deyil, birbaşa qanun pozuntusu və cinayət xarakterli hadisədir.
Siz özünüz də çox yaxşı bilirsiniz ki, bu həmin şəxsin birinci hərəkəti deyil.
Sözügedən şəxsin eyni zamanda sizin əməkdaşınız olması məsələni daha da ağırlaşdırır və ictimaiyyətdə haqlı narazılıq doğurur. Hər dəfə Marneuli ərazisində zorakılıq baş verəndən biz onda bilirik ki, bu şəxs bələdiyyədə çalışırmış.
Təəssüf ki, Marneuli bələdiyyəsi cəmiyyətdə getdikcə ailəvi maraqlara xidmət edən bir struktur təsiri bağışlayır. Təhsil, peşəkar bilik və təcrübəsi olmayan şəxslərin mühüm vəzifələrdə təmsil olunması şəffaflıq və ədalətlilik prinsiplərinə ziddir.
İctimaiyyət haqlı olaraq soruşur: belə şəxslər hansı əsasla bu vəzifələrdədir və onların fəaliyyətindən hansı fayda gözlənilir? Sizin bu hadisə ilə bağlı açıqlamanız “zorakılığı pisləyirəm, baş verənləri arzuolunmaz və pis fakt kimi qiymətləndirir və Qiqaninin qəsdən zorakılıq etmədiyini, sərxoş olduğunu və səhv etdiyini hesab edirəm” deməyiniz nə adekvat, nə də ədalətlidir.
Bu birbaşa başqa zorakı şəxsləri cinayətə həvəsləndirməkdir, onlar da içib, başqa şəxsə zərər verə bilər və onda nə siz nə də polis bu hadisələrin qarşısını ala bilməz. Bu cinayəti gizlətməyə cəhd etmək özü də qanun pozuntusudur. Məsələni ört-basdır etmək cəhdləri isə ictimai etimadı daha da zədələyir. Unutmayın ki, Marneuli xalqı uzun illərdir sizə etimad göstərmiş, azərbaycanlı icması da azərbaycanlı merlərdən çox sizə xüsusi hörmət bəsləmişdir. Bu etimadı itirmək, sadəcə şəxsi nüfuzunuza deyil, bütövlükdə bölgədəki ictimai sabitliyə zərbə vuracaqdır. İnsan yediyi qapa tüpürlməməlidir.
Qeyd etmək istərdim ki, Marneuli qanunla deyil, çox vaxt sifariş və təzyiqlə idarə olunur.
Əgər siz də bu təzyiqlərə boyun əyərək hadisəni yumşaltmağa çalışsanız, nəticələr ağır olacaq: millətlərarası münasibətlərdə gərginlik artacaq, vətənə bağlılıq zəifləyəcək və dövlətə inam ciddi şəkildə sarsılacaqdır. Biz gözləyirik ki, siz bu məsələdə prinsipial və qəti mövqe nümayiş etdirəsiniz. Bu, yalnız sizin şəxsi nüfuzunuz üçün deyil, həm də dövlətçilik və vətəndaş həmrəyliyi üçün zəruridir.
Mamuka Qiqani ilə yanaşı Tornike Mtvarelidze də bələdiyyədən uzaqlaşdırılmalıdır.
Az yaşlıya öz vətəninə get deyən Tornike hansı üzlə bu xalqa xidmət göstərəcək? Xalq Müdafiəçisi dəfələrlə öz hesabatında dövlət məmurlarının etnik azlıqlara qarşı kobud davranışına görə bələdiyyələrə daima tövsiyyələr təklif edib.

Unutmaq olmaz ki, vəzifədən irəli gələn məsuliyyət kreslo ilə ölçülmür – vicdan, ədalət və cəsarət tələb edir."

Marneuli Bələdiyyə Məclisinin sədri Amiran Qiorqadzenin bəyanatına görə, sentyabrın 19-da şirniyyat mağazalarından birində azyaşlıya qarşı zorakılıq edən Mamuka Qiqani barəsində intizam icraatı başlanacaq.
Mamuka Qiqani Marneuli Bələdiyyə Məclisinin əməkdaşı və sədr müavini Riçard Qiqaninin oğludur.
Bu gün, sentyabrın 22-də Bələdiyyə Məclisinin sədri Amiran Qiorqadze “Marneuli” radiosu ilə söhbətində Qiqaninin azyaşlıya qarşı zorakılıq etdiyini bildirib. O, zorakılığı qınayaraq baş verənləri arzuolunmaz hadisə kimi qiymətləndirib.
Qiorqadze Mamukanın bu hərəkəti qəsdən etmədiyini, sərxoş vəziyyətdə olduğunu və səhvə yol verdiyini qeyd edib. "Bu, arzuolunmaz, pis bir faktdır, amma hamıya demək istəyirəm ki, bu, qəsdən olmayıb. Səhv baş verib.
Həmin şəxs sərxoş olub və buna görə də səhv edib, indi məsuliyyətə cəlb olunub. Ayılanda vəziyyəti özü analiz edib, bildiyimə görə, polisə təslim olub, araşdırma aparılır. Cinayət faktı təsdiqlənərsə, hüquq-mühafizə orqanları qanuna uyğun hərəkət edəcəklər," – Amiran Qiorqadze deyib. Marneuli Bələdiyyə Məclisinin sədri belə faktların pis olduğunu, lakin onların siyasiləşdirilməməsinin vacibliyini vurğulayıb. Qiorqadze ictimaiyyəti lazımsız açıqlamalardan və bu kimi hadisələrdən çəkinməyə çağırıb.
"Hər kəsə demək istəyirəm ki, belə faktlar pisdir, bu məsələləri siyasiləşdirməməliyik. Əksinə, mən hər kəsdən xahiş edirəm ki, biz Marneulinin etnik bələdiyyə olması ilə fəxr edirik, biz bir-birimizin mədəniyyətinə, dininə, adət-ənənələrinə həmişə hörmətlə yanaşırıq. Bu, bizim üçün böyük bir ailədir, burada hörmət və sevgi ilə yaşamalıyıq. Hamıdan xahiş edirəm ki, belə hadisələrdən və lazımsız şərhlər verməkdən çəkinin," – Amiran Qiorqadze bildirib.

Marneuli Bələdiyyə Məclisi sədrinin izahatına görə, Mamuka Qiqaninin təqsiri sübuta yetirilərsə, o, qərar çıxarıb Qiqanini işdən azad edəcək. O, həmçinin Bələdiyyə Məclisində də intizam icraatına başlanacağını bildirib. "İttihamlar sübuta yetirilərsə, onun işdən azad edilməsi ilə bağlı qərar qəbul edəcəm.
Biz, əlbəttə ki, zorakılığı pisləyirik. Qanun qarşısında hamı bərabərdir. Cinayət sübuta yetirilməsə, yenə də iş yerində intizam icraatına başlayacağıq," – Amiran Qiorqadze deyib. Mediada yayılan məlumata görə, sentyabrın 19-da Marneuli Bələdiyyə Məclisi sədr müavininin oğlu şirniyyat mağazasının işçisinə gürcü dilini bilmədiyi üçün fiziki təzyiq göstərib. Yayılan videoda Riçard Qiqaninin oğlunun göründüyü və vətəndaşdan “kənara çəkilməsini” xahiş etdiyi eşidilir.

İfadələr rus dilindədir: “Успокойся брат” (Qardaş, sakit ol). Hüquq müdafiəçisi Samirə Bayramovanın sözlərinə görə, azyaşlıya qarşı zorakılıq işində Marneuli meriyasının əməkdaşı, “Gürcü Arzusu”nun proporsional siyahısına daxil olan Tornike Mtvarelidze də iştirak edib.
O, azyaşlıya şifahi söyüşlər edir. Baş vermiş hadisə ilə bağlı Daxili İşlər Nazirliyində Cinayət Məcəlləsinin 126-cı maddəsinin 1-ci hissəsi, yəni yetkinlik yaşına çatmayan şəxsə qarşı zorakılıq göstərmə ilə bağlı araşdırma başlayıb.
Sentyabrın 22-də zərərçəkmiş azyaşlıya və onun ailə üzvlərinə yerli özünüidarəetmə və hökumət tərəfindən təzyiqlər edildiyi barədə petisiya dərc olunub. Petisiyada “Gürcü Arzusu” partiyasından olan Riçard Qiqani və Tornike Mtvarelidzenin yerli özünüidarəetmə seçkilərinin proporsional siyahısından çıxarılması və Marneuli bələdiyyəsində tutduqları vəzifələrdən azad edilməsi tələb olunur.
O, həmçinin Mamuka Qiqaninin Marneuli Bələdiyyəsindən azad edilməsini, hüquq-mühafizə orqanlarının zərərçəkənə və onun ailə üzvlərinə təzyiqləri dərhal dayandırmasını tələb edir."

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.