შინაგან საქმეთა სამინისტროს სასაზღვრო პოლიციის ოპერატიულ-საგამოძიებო დეპარტამენტის თანამშრომლებმა, საპატრულო პოლიციისა და საბაჟო გამშვები პუნქტი „სარფის“ თანამშრომლებთან ერთად, საქართველოს სახელმწიფო საზღვრის უკანონოდ, ჯგუფურად გადაკვეთის მცდელობისა და მიგრანტების უკანონოდ გადაყვანის მცდელობის ფაქტზე 3 პირი დააკავეს.

გამოძიებით დადგინდა, რომ 1963 წელს დაბადებული უცხო ქვეყნის მოქალაქე ა.ა., მისი მართვის ქვეშ არსებული სატვირთო ავტომანქანაში მოწყობილი სამალავის გამოყენებით, ცდილობდა საქართველოდან თურქეთის რესპუბლიკაში 1978 წელს დაბადებული ი.ო.-სა და 2000 წელს დაბადებული მ.დ.-ს უკანონოდ გადაყვანას.

გამოძიება საქართველოს სისხლის სამართლის კოდექსის 19-344-ე მუხლის მეორე ნაწილის „ა“ ქვეპუნქტითა და 19-344 პრიმა მუხლის მეორე ნაწილის „ბ“ ქვეპუნქტით მიმდინარეობს, რაც 8 წლამდე ვადით თავისუფლების აღკვეთას ითვალისწინებს.