Saimerlo sakinlərinin etirazından sonra su sisteminin dəyişdirilməsi işləri müvəqqəti olaraq dayandırılıb
Bu gün, 24 iyun
tarixində Marneuli bələdiyyəsinin Saimerlo kəndinin sakinləri su
sisteminin dəyişdirilməsinə etirazlarını
bildiriblər.
Kənddə həyata keçirilən layihəyə əsasən su sistemi tamamilə
dəyişdiriləcək. Hal-hazırda kəndi su ilə təmin edən su mənbəyi
baxlanacaq, Saimerlo sakinlərinə isə başqa su mənbəyindən anbarlara
toplanmış su veriləcək.
Kənd sakinləri bu gün işlərin həyata keçirildiyi əraziyə
toplaşıblar. Onların əsas tələbi içməli suyun yenə də sakinlərin
illərdir ki istifadə etdiyi su mənbəyindən verilməsidir.
Saimerloda içməli suyun verilməsi işləri bir neçə həftə öncə
başlayıb. Sakinlər düşünürdülər ki, şirkət yalnız boruları
dəyişdirəcək. Layihənin 2015-ci ildə hazırlanmasına və merin
Tsereteli inzibati ərazi vahidliyindəki nümayəndəsi Şalva
Kupravanın sakinlərin planlaşdırılan dəyişikliklərlə bağlı məlumatı
olduğunu və qərarların sakinlərlə birgə qəbul edildiyini
bildirməsinə baxmayaraq, sakinlər su mənbəyinin dəyişdirilməsi ilə
bağlı heç bir məlumatlarının olmadığını bildirirlər.
Marneuli meri və içməli su sisteminin dəyişdirilməsinə məsul olan
şirkətin nümayəndələri sakinlərlə görüşmək üçün hadisə yerinə
gediblər. Marneuli meri sakinlərin tələbini dinlədikdən sonra
bildirdi ki, şirkətlə bərabər problemin həlli yolunu axtaracaqlar
və Saimerlonun hazırkı su mənbəyini saxlamağın mümkünlüyünü
araşdıracaqlar.
Marneuli meri Zaur Darğallı “Marneuli” radiosu ilə söhbəti zamanı
sakinlərə yekun qərar barəsində məlumatın nə zaman veriləcəyi ilə
bağlı dəqiq vaxt demədi.
Bu mərhələdə Saimerlo içməli su sisteminin dəyişdirilməsi işləri
dayandırılıb və sakinlər merin cavabını gözləyirlər.