Marneulili fəallar kitabxanada işlə təmin olunmanın partiya mənsubiyyətinə görə həyata keçirildiyini bildirirlər
Marneuli İctimai Kitabxanasının yeni əməkdaşı
var.
Nərgiz Əliyeva ötən gün, 22 iyul tarixində
şəxsi “Facebook” səhifəsində Marneuli meriyasında işə başlaması ilə
bağlı paylaşım edib.
Əliyevanın paylaşımı sosial mediada birmənalı qarşılanmayıb. Mülki
fəalların bir qismi bildirir ki, Nərgiz Əliyeva “Gürcü Arzusu”nun
üzvüdür və onun işlə təmin olunması da məhz partiya
mənsubiyyətindən irəli gəlir.
Marneulili tələbə və mülki fəal Rəşan Ziyadəliyev “Marneuli”
radiosu ilə söhbəti zamanı qeyd edir ki, Əliyeva 2016-cı ildən
bütün seçkilərdə iştirak edib və partiyanın adından tez-tez qadın
seçicilərlə görüşlər keçirirdi. Ziyadəliyevin sözlərinə görə, onun
etirazına ictimai strukturda kiminsə qeyri-şəffaf şəkildə işlə
təmin olunması olub. Çünki Marneuli İctimai Kitabxanasında belə bir
vakant yerin olmasından heç kəsin xəbəri olmayıb və Əliyevanın
gürcü dilini bilməməsi də onun partiya mənsubiyyətinə görə işlə
təmin olunması şübhəsi yaradır.
“Seçkiöncəsi kampaniyaya çox fəal şəkildə qoşulmuşdu.
Qadınlarla görüşlər keçirirdi və seçkilərdən təxminən 1 ay sonra
kitabxanada işə başladı. Bu artıq demokratik ölkə üçün normal hal
deyil. Belə şeylər regionda və müvafiq olaraq Gürcüstanda
demokratiyanın inkişafına mane olur”, – Rəşan
Ziyadəliyev deyir.
Nərgiz Əliyevanın partiya fəaliyyətini “Marneuli” radiosunun
yayımladığı materiallar da təsdiq edir. 2018-ci il prezident
seçkilərinin ikinci turunda Əliyeva “şirniyyat süfrəsi”
çərçivəsində Marneulili qadınlarla görüşlər keçirirdi və Salome
Zurabişvilinin təbliğatını aparırdı.
Biz Nərgiz Əliyevanın işə başlamazdan əvvəl hansı prosedurları
keçdiyini və sosial şəbəkədə onun partiya mənsubiyyətinə görə işlə
təmin olunması barədə yazılanlara münasibətini öyrənmək məqsədilə
onunla əlaqə saxladıq. Elə söhbətimizin başlanğıcından etibarən o,
rus dilində danışmamızı xahiş etdi, işlə təmin olunma prosesləri
ilə bağlı şərh verməkdən imtina etdi və Marneuli meriyasının
İctimaiyyətlə Əlaqələr Şöbəsinə yönləndirdi. Onun “Gürcü Arzusu”nun
üzvü olduğu üçün işlə təmin olunması ilə bağlı ittihamlara gəlincə,
o, bildirdi ki, 16 illik ictimai fəaliyyətini nəzər alaraq bu işə
layiqdir.
“Kitabxanada kitabları təsnifləndirən kimi işə
başladım. Mənə kitabları qəbul etmək, təsnifləndirmək və başqa
şeylər həvalə olunub. Bu elə də böyük vəzifə deyil ki, nəsə
yazasınız, nazir müavini olmamışam ki, bu kiçik bir
işdir”, – Nərgiz Əliyeva bildirdi.
“Marneuli” radiosu Nərgiz Əliyevanın kitabxanada işlə təmin olunan
zaman hansı mərhələləri keçdiyini öyrənmək məqsədilə Marneuli
İctimai Kitabxanasının rəhbərliyi ilə əlaqə saxlamağa çalışsa da,
kitabxananın direktoru hələ ki, zənglərə cavab vermir. Bu barədə
məlumat alan kimi sizlərlə paylaşacağıq.
"Marneuli" Radiosu