Zaur Darğallı bahalaşmış gediş haqqı fonunda tələbələrə verdiyi vədi yerinə yetirəcəkmi
Marneuli-Tbilisi istiqamətində hərəkət edən
nəqliyyatda gediş haqqı bahalaşıb. İndiyə kimi biletin qiyməti 2
lari idisə, indi bu məbləğə 50 tetri də əlavə olunub.
Qeyd
edilməlidir ki, Marneulili tələbələrin əksəriyyəti hər gün
Marneulidən Tbilisiyə getməli olurlar.
Bu isə böyük xərc tələb edir. Marneuli meri Zaur Darğallı seçki
proqramı çərçivəsində Marneulili tələbələrə “Marneuli” radiosunun
efiri vasitəsilə vəd verdi ki, xüsusi güzəştli nəqliyyat paketi
olacaq.
Artıq mer seçilmiş Zaur Darğallı bu gün bizimlə telefonla
müsahibəsi zamanı qeyd etdi ki, onun vədi qüvvədə qalır, ancaq
indiki mərhələdə məsələ hazırlıq prosesində olduğu üçün konkret nə
isə deməkdən çəkinir.
“Plan qüvvədədir. Biz yaxın gələcəkdə gənclərin inkişaf
strategiyasını elan edəcəyik. Orada komponentlərdən biri məhz
tələbələrə dəstək olacaq. Bu müxtəlif dəstək proqramlarında və
gediş haqqında meriya tərəfindən göstərilən dəstəkdə özünü
göstərəcək”, - Zaur Darğallı bildirir.
Marneuli merinin dediyinə görə meriya tərəfindən hazırlanan
strategiyanın hansı kateqoriyaya aid tələbələrə şamil olunması və
hansı əsas istiqamətləri əhatə etməsi ilə bağlı məlumat yaxın
gələcəkdə veriləcək və təqdimat keçiriləcək.