Sahibkarlıqla
məşğul olmaq istəyən Marneulili gənclərə Regional Gənc Sahibkarlar
layihəsinin II fazasında iştirak etmək imkanı
verilib.
Layihəyə əsasən 18-29 yaşlı gənclər sahibkarlıq ideyalarını
mükəmməl layihə kimi formalaşdırmaq üçün təlimlərdə iştirak
edəcəklər. Regionların İnkişafı Assosiasiyasının gənclər üzrə
rəhbəri Revaz Cavelidzenin bizimlə söhbəti zamanı bildirdiyinə
görə, layihə gənclərin sahibkarlıq vərdişlərinin formalaşmasına
istiqamətlənib.
“Layihə gənclərin mükəmməl biznes layihələr hazırlamaq
kimi vərdişlərinin inkişafına və qrant müsabiqələrində iştirakına
istiqamətlənib. Qrant müsabiqəsində qalib gəldikləri halda onların
təqdim etdikləri layihələrin maliyyələşmək şansı
olacaq”, – Revaz Cavelidze deyir.
Regional Gənc Sahibkarlar layihəsində iştirak edənlərin 10 000
lariyədək maliyyə əldə etmək imkanı olacaq. Layihə Marneuli ilə
yanaşı daha 8 bələdiyyədə, o cümlədən Bolnisi bələdiyyəsində də
həyata keçirilir.
Layihənin birinci fazasında Marneulidən 3 nəfər iştirak edirdi.
Onlar maliyyə əldə edə bilməmişdilər. Revaz Cavelidze ümid edir ki,
bu mərhələdə Marneulililər tərəfindən fəallıq daha yüksək
olacaq.
“Ümid edirəm ki, bu dəfə gənclər tərəfindən fəallıq
daha yüksək olacaq və layihədə iştirak etmək üçün ilk növbədə
qeydiyyatdan keçəcəklər”, – Revaz Cavelidze
deyir.
Proqramda iştirak etmək istəyən gənclər 3 oktyabr 2019-cu il, saat
17:00-dək Gələcək Gürcüstan naminə Regionların İnkişafı
Assosiasiyasının rəsmi veb-səhifəsində qeydiyyatdan keçə
bilərlər.
Proqrama “Gürcüstanda istehsal et”, “Yaradıcı Gürcüstan”, Gürcüstan
İnnovasiyalar və Texnologiyalar Agentliyi, Milli Turizm
Administrasiyası, Kənd Təsərrüfatı Layihələrinin İdarəolunması
Agentliyi, “Kristal” maliyyə təşkilatı, Gürcüstan Milli Bankı və
TBC Bank dəstək verir.
"Marneuli" Radiosu