Marneuli bələdiyyəsinin Uşaq Bağçaları Birliyi
ötən gün, 2 oktyabr tarixində bağça əməkdaşlarına əlavə maaş
köçürüb.
Birliyin rəhbəri Zaur Kərəmovun bildirdiyinə
görə, əməkhaqqı qədər məbləğ “töhmət” almayan əməkdaşlara
köçürülüb, Kərəmov gizlilik prinsipinə görə belə əməkdaşların
sayının nə qədər olduğunu isə qeyd etmir.
“Töhmət alan və iş saatı az olan əməkdaşlardan başqa
hamıya əlavə əmək haqqı köçürülüb. Biz monitorinq aparırıq və iş
prosesində, monitorinq nəticəsində töhmət verilirsə, heç bir halda
əlavə əməkhaqqı köçürülə bilməz. Belə əməkdaşların sayı çox deyil,
amma bu gizli məlumatdır və deyə bilmərəm”, – Zaur
Kərəmov deyir və qeyd edir ki, mükafat verilməsi qərarını
əməkdaşların fəaliyyətinə görə veriblər.
“Olduqca çox çalışırlar, uşaqlara qayğı göstərmək üçün
böyük əmək sərf edirlər və ona görə əlavə əməkhaqqı
verdik.”
Qeyd edək ki, bağça əməkdaşlarına əlavə əməkhaqqı 2 oktyabr
tarixində köçürülüb. Həmin gün “Marneuli” radiosu 3 saylı uşaq
bağçasında olan problemlə bağlı süjet hazırlamışdı və müəllimlər
çatışmayan çarpayılara, qruplarda uşaqların sayının çox olmasına və
əmək haqqına görə öz narazılıqlarını bildirmişdilər. Əlavə
əməkhaqqının köçürülməsinin “Marneuli” radiosunun süjeti ilə bağlı
olub-olmaması barədə suala cavab olaraq Kərəmov bildirdi ki, əlavə
əməkhaqqının verilməsi prosesinə 20 sentyabrdan
başlayıblar.
"Marneuli" Radiosu