Kirəç Muğanlı sakinləri günlərdir işləməyən bələdiyyə nəqliyyatlarından şikayətlənirlər
Kirəç Muğanlı
sakinləri günlərdir işləməyən bələdiyyə nəqliyyatlarından
şikayətlənirlər.
Hər gün, səhər saatlarında iş üçün Marneuliyə gəlməli olan sakinlər
yolda saatlarla avtobus gözləyirlər. Lakin səhər saat 8:00-da
çıxmalı olan bələdiyyəyə məxsus avtobus işləmədiyindən onlar işə
gecikməli və ya taksi ilə gəlməli olurlar.
Sakinlərin sözlərinə görə, bəzən bələdiyyə avtobuslarını səhər
saatlarında qonşu kənd, Qaçağan kəndinə məxsus avtobuslar əvəz
edir. Amma o da gəlməyəndə yolda qalmalı olurlar.
“Elə yaxşı idi ki, marşrut olmayanda Qaçağan
avtobusuyla gedirdik. İndi o da gəlmir. Nə səhər saat 8, nə də
axşam rayondan çıxan 6 marşrutu olmur. Bəs biz işə saat neçədə
gedib, neçədə gələk? Nə qədər işə gecikmək olar?” –
Kirəç Muğanlı kənd sakini deyir.
Kənd sakinlərinin sözlərinə görə, həftə ərzində bələdiyyə
nəqliyyatı işləmədiyi günlər işə taksi ilə gəlməli olurlar. Bu isə
onların xərcini artırır. Beləliklə Marneuliyə gəlmək üçün bir neçə
nəfər toplanaraq taksi ilə gəlir və yola 2 lari deyil, 1 nəfər üçün
5 lari ödəməli olurlar.
“Aldığım maaş yollarda qalır. Bir neçə gündür
marşrutkalar işləmir, həftədə 3 dəfə taksiylə gəlmək mənə xeyir
etmir. Əgər xarabdırsa, bunun çarəsini tapsınlar. Hər il bu vaxt
marşrutkalarda nə isə problemlər olur, heç yaxşı
işləmirlər”, – Kirəç Muğanlı kənd sakini deyir.
Bizimlə söhbət zamanı “Avtopark” MMC-in (Bələdiyyənin balansında
olan MMC) direktoru Qiqa Calağoniya bildirdi ki, Kirəç Muğanlı
xətti üzrə işləyən iki avtobus xarab olub. O, bildirdi ki,
avtobusların birinin mühərriki yanıb. Digər avtobus isə bu gün
təmir olunacaq və sabah adi rejimdə reysləri həyata keçirəcək.