Marneuli meriyası Gürcüstan Ümumi İnzibati
Məcəlləsini pozub.
Meriya “Marneuli” radiosu tərəfindən tələb olunan ictimai məlumatın
verilməsi ilə bağlı məktuba hələ cavab verməyib. “Marneuli” radiosu
14 noyabr tarixində meriyadan bələdiyyə nəzdindəki təşkilat və
məhdud məsuliyyətli cəmiyyətlərin 9 aylıq hesabatı ilə bağlı
məlumat tələb etmişdi. Meriya məktubu 15 noyabr tarixində
qeydiyyatdan keçirdi və müvafiq olaraq 10 iş günü ərzində, yəni 28
noyabradək məktuba cavab verməli idi.
Marneuli meriyasının İnformasiya və Statistika Şöbəsinin rəhbəri
İrine Maçaraşvilinin bu gün, 5 dekabr tarixində “Marneuli”
radiosuna bildirdiyinə görə, meriya məktubu hazırlayıb, lakin merin
imzası lazımdır və ona görə də bu günədək göndərə bilməyiblər.
İnsan Hüquqları Araşdırma və Monitorinq Mərkəzinin hüquqşünası və
araşdırmaçısı Mariam Qabrielaşvilinin “Marneuli” radiosuna
bildirdiyinə görə, ictimai müəssisələr vətəndaşların və ya
təşkilatların məktublarına ən çox 10 gün ərzində cavab
verməlidirlər.
“Real olaraq, qanunvericilikdə belə müəyyən olunub ki,
dərhal məlumat verilməlidir. Fikrimcə bizim inzibati orqanlar bu 10
günlük müddətdən kifayət qədər sui-istifadə edirlər. Beş gündə, üç
gündə və ya elə həmin gün verə biləcəkləri məlumatı uzadırlar və
bütün hallarda 10 iş günündə verirlər”, –
Qbrielaşvili deyir və əlavə edir ki, əgər inzibati orqan
informasiyanın həcmindən asılı olaraq 10 gün ərzində cavab verə
bilmirsə, o zaman meriya ictimai məlumat tələb edən şəxsə müraciət
edərək müvafiq məlumatla inzibatı orqanda yerindəcə tanış olmağı
təklif edir.
Qeyd edək ki, Marneuli meriyası “Marneuli” radiosunun tələb etdiyi
məlumata dərhal cavab verə bilərdi, belə ki, meriya nəzdindəki
təşkilat və müəssisələr 9 aylıq hesabatı artıq təqdim
ediblər.
"Marneuli" Radiosu