62 yaşlı Gülzadə Məmmədova Marneulidə, Kostava küçəsi 33 ünvanında
yaşayır.
O, 8 ildir ki, xərçəng xəstəliyindən əziyyət çəkir. 8 il əvvəl
özünü narahat hiss edən Gülzadə Tbilisidə, Diğomidə yerləşən
xəstəxanalardan birinə müraciət edir. Ona döş xərçəngi diaqnozu
qoyulur və nəticədə döşlərindən biri əməliyyat olunaraq,
götürülür.
“Marneuli” radiosu ilə söhbəti zamanı o, bir müddət sonra ayağının
altında yaranan dəri çatlarından ayağına infeksiya keçdiyini deyir.
Pandemiya zamanı yollar bağlı olduğundan Məmmədova Marneulidəki
Aversi klinikasına müraciət edir. Bu dəfə Məmmədova ayağından
əməliyyat edilməli olur. Əməliyyatdan sonra da onun ayağındakı şiş
azalmır.
Yenicə əməliyyat olunmuş Gülzadənin bu dəfə sol döşündə şiş yaranır
və Marneulidə yerləşən xəstəxanalardan birinə müraciət edir. Onun
döşündə olan şişi aradan qaldırmaq üçün həkimlər ona kimya
müalicəsi tətbiq edirlər. Kimya müalicəsi Məmmədovanın döşünə yaxşı
təsir etsə də, yenicə əməliyyat olan və şişi azalmayan ayağına
mənfi təsir göstərir. Onun sözlərinə görə, həkimlərin diqqətsizliyi
nəticəsində ayağından bir neçə dəfə əməliyyat olunmağa məcbur
qalıb.
Hazırda Məmmədova 6 nəfərdən ibarət olan ailəsi ilə birlikdə
yaşayır. Yoldaşı illərdir onun dərmanlarını ala bilmək, həkimə
aparmaq üçün banklardan götürdüyü kreditləri ödəmək üçün
gecə-gündüz çalışır. Ailənin yeganə oğlu restoranda işləyirmiş.
Lakin koronavirusa görə qoyulan qadağalardan sonra onun restoranda
olan işi də dayanır. İndi ailənin gündəlik ehtiyaclarını qarşılamaq
üçün heç bir gəlir mənbəyi yoxdur. Gülzadənin aldığı aylıq təqaüdü
isə onun iynə-dərmanlarını ancaq görür.
G.Məmmədovanın yoldaşı Ayvaz Məmmədov deyir ki, sosial yardım almaq
üçün dəfələrlə Marneuli Sosial Xidmət Agentliyinə müraciət edib. O,
ailə vəziyyətlərinin çətin olduğunu, yoldaşının xəstə olduğunu desə
də, ona sosial yardım verilməyib. Məmmədovun sözlərinə görə, Sosial
Xidmət Agentliyindən onlara sosial yardımın düşmədiyini və 96
balları olduğu üçün yadım almalarının imkansız olduğunu
deyiblər.
Ailə hal-hazırda dövlətdən sosial yardım almaq üçün onlara kömək
olunmasını tələb edir.