Bolnisi rayonunun Saraçlı kənd sakini və Saraçlı ictimai məktəbinin
gürcü dili müəllimi Mövlud Mehrabov Gürcüstan universitetləri
arasında keçirilən müsabiqədə birinci yerin qalibi olub.
Bu barədə Mehrabov “Marneuli” radiosuna müsahibəsi zamanı məlumat
verdi.
Onun sözlərinə görə, doktoranturada elmi rəhbəri olan Rusudan
Saknadzenin təklifi ilə müsabiqəyə qatılmaq qərarına gəlib. Gənc
müəllimin sözlərinə görə, müsabiqə 3 mərhələdən ibarət olub.
Birinci mərhələdə müsabiqənin qalibi universitetdə, ikinci
mərhələdə nazirlikdə, üçüncü mərhələdə isə prezident sarayında
prezidentin seçimi ilə seçilir.
“Bu müsabiqə 3 mərhələdən ibarətdir. Birinci
universitet içində müsabiqə olur. Universitet tələbələrinin,
magistr, doktorantura tələbələrinin arasında. Universitet öz içində
bir namizəd seçir. Sonra isə onu nazirliyə göndərir. Sonra isə
Gürcüstandakı universitetlər arasında müsabiqə olur. Oradan isə
birinci yerə çıxan prezidentə göndərilir. İlk mərhələdə
universitetdə mən seçildim. Mənə dedilər ki, belə bir müsabiqə var,
sən də iştirak et. Bir əsər, nağıl götürürsən. Etimad Başkeçid var,
onun əsərini – “Velosiped” nağılını tərcümə etdim. Universitetə
göndərdim. Bəyəndilər və qalib etdilər, nazirliyə göndərdilər.
Orada da birinci yerə çıxdı. Hal-hazırda isə oradan da prezidentə
göndərilib. Prezident də bu ayın ortaları qərar verəcək və dəvət
edəcək. Tbilisidə mükafatlandırma olacaq. Orbeliani evində
mükafatlandırma olacaq. Sonuncu mərhələ həm ədəbiyyat üzərində
oldu, həm tərcümə edə bilərdin, həm də elmi işlər haqqında nələrsə
tərcümə edə bilərdin. 4 nəfər qaldıq axıra. 4 nəfər nazirlikdən
çıxıb, ən gözəl tərcümələr çıxıb. İndi birini prezident
seçəcək.”
M.Mehrabov müsabiqə üçün Etimad Başkeçidin əsərinə müraciət
etdiyini deyir. O, “Velosiped” əsərini gürcü dilinə tərcümə edib.
Qalib deyir ki, bu əsər maraqlı olması ilə yanaşı azərbaycanlı
ailənin yaşam tərzi, ailə mədəniyyəti və qaydalarından bəhs
edir.
“Özüm şəxsən o əsəri seçdim. Əsərdə azərbaycanlıların
yaşayış tərzi haqqında, ailə içində söhbətlərdən bəhs edir. Əsas
məqsədim də o idi ki, gürcü xalqına azərbaycanlıların yaşayış
tərzini, ailə mədəniyyətini təqdim edim. Çox da bəyənildi.
Kutaisidə “Poeziya Günləri” jurnalında mənim tərcümə etdiyim əsər
çap olundu. Yaxın gündə başqa qəzetlərdə də
çıxacaq.”
Qalib gəlməyin gözəl hiss olduğunu deyən Mehrabov qalibiyyətin onu
bu qədər sevindirəcəyini düşünmürmüş.
“Qalib gəlmək çox gözəl hissdir. Mən belə gözləmirdim.
Bir neçə yerlərdə müsabiqələrdə iştirak etmişəm. Adi bir şey kimi
qarşılayırdım. Amma paylaşdım, dostlarıma deyəndə çox təbriklər
aldım. Mənim üçün daha böyük sevinc oldu. Onların təbriklərindən
qürurlandım. Həm öz adıma, həm ailəm, həm millətim
adına.”
Məlumat üçün qeyd edək ki, hazırda müsabiqənin universitet
tərəfindən seçilib nazirliyə göndərilən 4 nəfər qalibi var.
Bunlardan 3 nəfəri gürcü, bir nəfəri isə Mövlud Mehrabovdur.
Müsabiqənin son mərhələsində isə Gürcüstanın prezidenti Salome
Zurabişvili tərəfindən yeganə qalib seçiləcək. Seçim isə iyun
ayının ortalarına təsadüf edəcək.