Marneuli yerli özünüidarəsi havadan çəkiliş üçün dron alıb.
Marneuli meriyası dronun alınması üçün “Kopter Tek” MMC ilə
sadələşdirilmiş müqavilə bağlayıb.
Meriyanın İctimaiyyətlə Əlaqələr Şöbəsinin rəhbəri Davit Çikadze
dronun alınması tələbi ilə Marneuli meri Kənan Ömərova müraciət
edib. Çikadze “Marneuli” radiosu ilə söhbəti zamanı bildirdi ki,
meriya müxtəlif tədbirlərdə çəkiliş üçün dron icarəyə götürməli
olurmuş. Yerli özünüidarə məhz buna görə, dron almağa qərar
verib.
“Uzun zamandır dron almaq məqsədimiz var idi. Çünki 26 may, Novruz
bayramı, yeni il və müxtəlif böyük tədbirlərdə dron icarəyə
götürməli oluruq. Ona görə də dronun özümüzdə olmasını və bu
xidmətin daha ucuz başa gəlməsini məqsədyönlü hesab etdik”, – Davit
Çikadze bildirdi.
Marneuli meriyasının İctimaiyyətlə Əlaqələr Şöbəsinin rəhbərinin
sözlərinə görə, meriya dronu artıq alıb və bu gün, 3 iyun
tarixində, yaxud gələn həftənin əvvəli o artıq meriyada olacaq.
Sadələşdirilmiş müqavilənin izahatnaməsində qeyd olunduğuna görə,
meriyanın əldə etdiyi dron aşağıdakı göstəriciləri əhatə edir:
- Foto çəkiliş: Ən az 48MP;
- Video çəkiliş: Ən az 4K/60fps;
- Uçuş məsafəsi: Ən az 6km;
- Uçuş müddəti: Ən az 34 dəq;
- Dəstək FocusTrack, HDR, foto, video, panorama 8K
hyperlaps;
- Rəsmi zəmanət ən az 12 ay
- Marneuli meriyası dron üçün “Kopter Tek” MMC-yə 4 999
lari ödəyib.