Bu gün, 20 iyun tarixində Marneuli bələdiyyəsinin ictimai məktəblərində Qəyyumlar Şurası seçkiləri keçirilir. Qəyyumlar Şurası təhsil müəssisələri idrəçiliyində mühüm bəndlərdən biridir.

Şura valideyn, pedaqoqlar şurası tərəfindən bərabər sayda, 3 il müddətinə seçilmiş ən az 6 və ən çox 12, orta pillə şagirdlər özünüidarəsinin seçdiyi 1 nümayəndədən təşkil olunur. 

Təhsil Resurs Mərkəzinin rəhbəri vəzifəsini icra edən Əli Qəhrəmanov “Marneuli” radiosuna bildirdi ki, Qəyyumlar Şurası seçkiləri Marneulinin 74 məktəbində saat 10:00-dan başlayıb. Proses sakit rejimdə davam etdirilir.


“Seçki məntəqələri bütün məktəblərdə açılıb və seçki saat 4-ə qədər davam edəcək. Sonra yekun protokollar “eschool” bazasına yüklənəcək. Bütün məktəblərdə sakitçilikdir. Problem yoxdur. 23 iyuna qədər yekun nəticələri yayımlanacaq”, – Əli Qəhrəmanov bildirdi.

Məktəblərdə seçkilər saat 16:00-da başa çatacaq. Qəyyumlar Şurasının əsas funksiyası direktor seçmək, büdcəni idarə etmək və daxili intizamı müəyyənləşdirməkdir.