“Eydul-Əzha” da adlanan Qurban bayramı İslam aləmində ən böyük
bayramlardan biridir. Bütün müsəlman aləmində hər il Ramazan
bayramından 70 gün sonra qeyd olunur və üç gün davam edir.
Bu barədə məlumatı “Marneuli” radiosu ilə söhbəti zamanı Bütün
Gürcüstan Müsəlmanları İdarəsinin şeyxi Hacı Ramin İgidov verdi.
Onun sözlərinə görə, bayramda qoyun, qoç, inək, dana və ya dəvə
kəsilir.
“Bu gün Qurban kəsmə adəti hamıya məlum olduğu kimi Hz.
İbrahim Peyğəmbərin (ə) həyatında baş verən hadisədən – oğlu Hz.
İsmayılı (ə) Allah yolunda qurban kəsmə sınağına çəkilməsindən
sonra yaranmışdır. Buna görə də Qurbanlıq bayramında kəsilən
qurbana “İsmayıl qurbanı” da deyirlər. Çox sevdiyi balasını Allah
yolunda qurban verməyə hazır olması peyğəmbərin Allah qarşısında
imanının, səmimiliyinin və əsl bəndəliyinin bariz sübutudur. Odur
ki, din tarixində dərin iz salmış bu hadisə Allaha inamın, dərin
etiqadın nümunəsi olaraq yaşamışdır”, – Ramin İgidov
dedi.
Ramin İgidovun dediyinə görə, imkanı olan hər bir şəxs qurban
kəsərək, paylamalıdır.
“Qurban kəsmək Həcc mərasimini icra edən Hacılara
vacibdir. Məkkə şəhərindən kənar olan və Həcc mərasimində olmayan
müsəlmanlara isə tövsiyə olunan yaxşı – müstəhəb əməllərdəndir.
Qurban bayramında hər bir imkanlı müsəlman qurban kəsib, onun
ətinin bir hissəsini imkansızlara, kasıblara paylamalıdır.
Qurbanlıq sahibi əti üç hissəyə bölüb birini özü və ailəsi üçün
götürə, qalan iki hissədən birini də öz qonşularına və yaxınlarına
verə bilər. Digər bir hissəni isə mütləq ehtiyacı olanlara
paylamalıdır. Lakin qurban sahibi istəsə, ətdən özünə pay
götürmədən, hamısını ehtiyaclılara paylaya bilər. Burada əsas
məqsəd dindarlığa və ilahi razılığa nail olmaqdır. Qurani-Kərimdə
buyurulur ki, kəsilən qurbanların nə əti, nə də qanı Allaha çatmaz,
Allaha çatacaq olan yalnız sizin təqvanızdır. Qurban ibadəti bizə
Allah yolunda paylaşmağı, kasıblara əl tutmağı öyrədir. Qurban
Allaha olan sevginin isbatıdır. Yaradana olan sevgimizi göstərmək
üçün bizim üçün dəyərli olanlardan infaq etməliyik”,
– İgidov bildirdi.
Ramin İgidov onu da əlavə etdi ki, bu il müqəddəs Qurban bayramı
təqvimə görə, 10 iyul tarixindən başlayaraq, 3 gün qeyd ediləcək.
Bəzi müsəlman ölkələrində isə bayram iyulun 9-dan başlayacaq.