Tikilməkdə olan Marneuli-Lomtaqora-Algeti yolunda asfalt örtüyü
çöküb. Yolda iri çatlar və çuxurlar əmələ gəlib.
Bu da hər gün bu yoldan istifadə edən sürücülərə narahatlıq
yaradır. Həmin yoldan istifadə edən sürücülər “Marneuli” radiosu
ilə söhbətləri zamanı bildirdilər ki, yolun tikintisinə
başlanılanda çox seviniblər. Amma təəssüflə qeyd edirlər ki, yeni
salınan və hələ istifadəyə verilməyən yol indidən sıradan
çıxıb.
“Bu yol çəkiləndə regionda yaşayan camaat, o cümlədən
mən də çox sevindim ki, şükür Allaha, yol çəkilir. Fukirləşdim ki,
bu yol 30-50 il gedər. Biz nəslə və bizdən sonrakı nəslə bəs edər.
Təəssüf ki, yol hələ tamamlanmamış gördüyünüz kimi, bu vəziyyətə
düşüb. Yol ortadan dağılıb. Çox pis vəziyyətdədir. Mənim fikirimcə,
bir balaca diqətsizlik etsən, bunun ağır nəticələri olar. 55 yaşım
var, heç belə yolun çəkildiyini görməmişəm. Təzə çəkilən yol bu
vəziyyətə necə düşə bilər? Xahiş edirik ki, bu işə baxsınlar. Bu
yolu təzədən təmir etsinlər, nəsə bir şey etsinlər. Yol çox bərbad
vəziyyətdədir. Mən günaşırı bu yoldan istifadə edirəm. Bu yol axıra
kimi çəkilməyib. Söhbət ondan gedir ki, çəkilmiş yol bərbad
vəziyyətə düşüb”, – sürücü bildirdi.
Yolun tikintisinə 2021-ci ildən başlanılıb. Amma tikinti işləri
hələ ki, başa çatmayıb. Asfalt qatının çəkildiyi hissələrdə
çökmələr, dağılmalar müşahidə olunur. Ərazidə mal-qara otaran
çobanlar deyirlər ki, yolun xarab olmuş hissəsini görməyən
sürücülər qəza törədirlər.
“Biz burada mal otarırdıq. Bir də uzaqdan gördük ki,
bir dənə sement yüklü “Kamaz” gəlir. Yol xarab olduğundan yolun
qırağına çəkdi, maşını çevirdi. Hara gedirsən, “yamadır”, yol
qalxıb. Bir sürücü də o çökəkdə yolun düzəlib-düzəlmədiyini
bilmirdi. Düzünə gəlirdi. Az qaldı maşınla mənim belimə minə. Maşın
Marneuli istiqamətində hərəkət edirdi, anidən “tormozladı”. Ağzı
çevrildi Vin Sovxoza doğru. Anidən tormozladı, az qaldı ki,
çevrilə”, – ərazidə mal-qara otaran çoban dedi.
Qeyd edək ki, yoll 15 kilometr uzunluğundadır və beynəlxalq
əhəmiyyətli Tbilisi-Qırmızı körpü avtomobil yolunun üzərində
yerləşir, həmçinin Rustavi və Marneuli arasında ən qısa yoldur.
Layihənin maliyyələşdirilməsi dövlət büdcəsindən həyata keçirilir
və dəyəri 12,6 milyon laridir. Bərpa işlərini Gürcüstanın Avtomobil
Yolları Departamenti həyata keçirir və layihənin 2022-ci ildə başa
çatdırılması nəzərdə tutulub.