Təzəgül Qəribova Marneuli 5 saylı ictimai məktəbin məzunudur. O,
vahid milli imtahanlarda yüksək bal toplamış gənclərdən biridir.
Gürcü dilini öyrənməyə 11 yaşından başlayıb.
Gürcüdilli məktəbə getməsi ona qismən narahatçılıq yaradıb, ancaq
gürcü dili və ədəbiyyatından yüksək bal alıb. Təzəgül 60 baldan 51
bal toplayıb. O, deyir ki, gürcü dili və ədəbiyyatını sevir.
Poemalar arasında isə “Pələng dərisi geymiş pəhləvanı” xüsusi qeyd
edir.
“Pələng dərisi geymiş pəhləvanı” xüsusilə sevirəm, imtahanın
mövzusu da bu idi. Ola bilsin bəxtim də gətirdi, duam qəbul oldu.
Həmişə arzulayırdım, bu mövzu düşsün. Məktəbdə də çox
hazırlaşırdım, özəl hazırlığa da gedirdim. Hamının, ilk növbədə
valideynlərimin dəstəyinin nəticəsidir. Çünki həmişə mənim yanımda
olublar. Mən ilk başdan gürcü məktəbində oxumurdum, rus məktəbinə
gedirdim, rusdilli bölməyə. Beşinci sinifdə Marneuli 5 saylı
ictimai məktəbinə keçdim və düşünürəm ki, düzgün qərar
verdim”, – Təzəgül Qəribova bildirir.
Təzəgül artıq bütün fənlərdə nəticələri bilir. Onun arzusu Tbilisi
Dövlət Tibb Universitetində təhsil almaq və neyrocərrah
olmaqdır.