Bu gün, 31 oktyabr tarixində Bütün Gürcüstan Müsəlmanları
İdarəsinin şeyxi Hacı Ramin İgidov, idarənin Şərqi Gürcüstan üzrə
müftisi Etibar Eminov və Marneuli meri Kənan Ömərov arasında görüş
keçirilib.
Görüş zamanı Marneulidə məscidlərin və onun ətrafında dəstəmaz
yeri, eləcə də digər müxtəlif tiklilərin ətrafında yaradılan süni
maneələr müzakirə olunub.
Bu barədə “Marneuli” radiosuna “Bütün Gürcüstan Müsəlmanları
İdarəsinin” mətbuat xidmətindən məlumat verilib.
Məlumata görə, son günlər Axlı Lələ və Yuxarı Saral kəndində olan
məscidlərin ətrafında yaranan problemlərdən də söhbət açılıb.
Görüşdə Marneuli meri Kənan Ömərov məscidlərin ətrafında yaranmış
problemlərin üzərində işlədiklərini və mövcud problemlərin artıq
həll olunmaq üzrə olduğunu bildirib. Mer Axlı Lələ kənd məscidinə
yazılan cərimələrin isə müvafiq işlər aparıldıqdan sonra onun
ödənilməməsi üçün lazım gələn bütün addımları atılacağını qeyd
edib.
"BGMİ"-nin üzvləri tikintisi dayandırılan Axlı Lələ kənd məscidinə
də baş çəkiblər.
Xatırladaq ki, Marneuli rayonunun Axlı Lələ kənd
sakinləri kənd məscidinin tikintisində yaradılan süni maneələrdən
və tətbiq edilən cərimələrdən şikayətlənirlər. Onların sözlərinə
görə, məscid sakinlərə məxsus olan torpaq sahəsində, sakinlərin
maliyyə dəstəyi ilə tikilir. 2 il ərzində meriya tərəfindən yazılan
cərimənin məbləği 10 000 laridən artıqdır.
Onu da əlavə edək ki, hal-hazırda Axlı Lələ kəndində tikintisi
dayandırılan məscidin torpaq sahəsi Bütün Gürcüstan Müsəlmanları
İdarəsini mülkiyyətindədir.