“Həmrəylik Muzeyinin” Dmanisidən olan fəal üzvünə qarşı
müəyyən təzyiqlər olur, – Bu barədə məlumatı
“Marneuli” radiosu ilə söhbəti zamanı “Həmrəylik Muzeyi”
təşkilatının rəhbəri Elnur Əlisoy verdi.
Onun sözlərinə görə, muzeyin idarə heyətinin üzvü, mülki fəal
Ruslan Ömərov ilə artıq bir müddətdir ki, müxtəlif işlər görürlər.
O, Ömərovun Dmanisidə fəal şəkildə çalışdığını və insanların
məlumat alması, daha fəal olmaları üçün əlindən gələni etdiyini
vurğuladı.
Əlisoy deyir ki, Ruslan Ömərov artıq bir neçə vaxtdır ki, ona qarşı
bir neçə dəfə təzyiqlərin olduğunu dilə gətirib. Ötən gün isə
Ömərov ailəsi ilə birlikdə Dmanisidən Tbilisiyə gedərkən naməlum
şəxslər tərəfindən yolda saxlanılıb. Adi vətəndaş geyimində olan
iki nəfər şəxs onların üzərində axtarışlar edib və xoşagəlməz
ifadələr səsləndiriblər.
“Son zamanlarda fikir verirdim ki, özünün də dediyi
kimi Ruslana qarşı təzyiqlər olurdu. Ona qarşı, ailəsinə qarşı
təzyiqlər, hədələr olurdu. Dünən baş vermiş hadisə son damla kimi
göründü. Dünən polis, yaxud hər hansı hüquq mühafizə orqanlarının
geyimlərini geyinməmiş insanlar yaxınlaşıblar və suallar verib,
şəkillərini çəkib, ciblərini yoxlayıblar. Həmçinin şərəf-ləyaqəti
alçaldacaq ifadələrlə müraciət ediblər. Bunların hamısı boşuna
olmur. Mən düşünürəm ki, bunlar bizim və Ruslanın Dmanisidəki
fəaliyyətindən narahat olanların etdikləri, planlaşdırdıqları bir
şeydir ki, onu və ailəsini belə sıxırlar”.
Elnur Əlisoy deyir ki, son günlərdə Dmanisidə bağçaların açılması
mövzusunda da Ruslan Ömərov fəal şəkildə çalışırmış. Onlar
bağçaların açılması ilə bağlı petisiya da toplayıblar. Lakin
petisiya qəbul olunmayıb. Bundan sonra isə onlar Dmanisi
bələdiyyəsini şikayət edib, məhkəməyə veriblər.
“Ruslan Dmanisidə pozitiv dəyişikliklər etmək üçün
aktiv şəkildə çalışan bir üzvümüzdür. Biz onunla Dmanisidə, Səfərli
kəndində ictimai kitabxana təşəbbüsünün əsasını qoymuşduq. Orada
bir otaq açdıq, buranın həm də ictimai mərkəz kimi fəaliyyət
göstərməsi planlaşdırılır. Hazırda o, işlərini orada davam etdirir.
Bütün kampaniyalarda, təşviqat fəaliyyətində bizə dəstək olur.
Bizim bütün layihələrimizdə Ruslan aktiv iştirak edir. Kovid zamanı
vaksinasiya ilə bağlı insanları məlumatlandırırdı. Soyadları ilə
əlaqədar olaraq imza toplanması ilə bağlı, Dmanisidə uşaqlar üçün
bağçaların açılması tələbi ilə bağlı irəli düşmüşdü. Hazırda da bu
istiqamətdə petisiyalar imzaladırlar, göndərdilər. Petisiyalar
qəbul olunmadı. Hazırda bələdiyyəni məhkəməyə veriblər. Faktiki
olaraq orada mübarizəni davam etdirirlər”.
Əlisoy deyir ki, onlar baş verən son hadisədən sonra səssiz qala
bilməyiblər və yeni kampaniyaya başlayıblar. Kampaniya çərçivəsində
onlar Daxili İşlər Nazirliyi və Xalq Müdafiəçisinin təzyiq göstərən
şəxslərə münasibət bildirməsini, həmin şəxslərin qanun qarşısında
cavab verməsini tələb edirlər.
Eyni zamanda onlar media qurumlarının bölgədə yaşayan, fəal şəkildə
çalışan mülki fəallara dəstək olmalarını istəyirlər.
“Ruslan bizim sadəcə üzvümüz deyil, bizim idarə
heyətimizin üzvüdür. Ona görə düşündük ki, biz buna mütləq reaksiya
verməliyik. Ona görə belə bir müraciət yayımladıq, mövqeyimizi
bildirib tələblər də irəli sürdük. Tələblər içərisində o idi ki,
DİN və Xalq Müdafiəçisi bu işlə maraqlansın. Həmin şəxslər müəyyən
olunsun ki, onlar kimlər idi və onlara qarşı qanuni addımlar
atılsın. Öz vəzifələrindən sui istifadə edən bu şəxslər qanun
çərçivəsində cəzalandırılsın. Media qurumlarından isə tələbimiz
odur ki, onlar bölgədə yaşayan və fəaliyyət göstərən mülki
fəallara, ictimai fəallara dəstək olsunlar. Müəyyən media
kampaniyalar aparsınlar və süjetlər, materiallar hazırlasınlar. Son
olaraq isə istəyirdik ki, donor təşkilatlar, beynəlxalq təşkilatlar
bölgələrdə yaranmış, etnik azlıqlar tərəfindən yaradılmış
təşəbbüslərə yardımçı olsunlar, dəstək göstərsinlər. Dünən bununla
bağlı paylaşım etdik və müxtəlif təşkilatlara müraciət edib
kampaniyaya qoşulmalarını istədik”.
Həmçinin onlar müraciətlərində donor və beynəlxalq təşkilatların
etnik azlıqlar tərəfindən yaradılmış təşəbbüslərə dəstək, yardım
göstərməsini istəyirlər.