Bu gün, 21 fevral tarixində Beynəlxalq Ana Dili Günü qeyd olunur.
Dil hər bir millətin maddi və mənəvi irsini qoruyan və inkişaf
etdirən ən mühüm və ən güclü vasitədir. Hər bir insan öz ana dilini
yaxşı bilməli və onu qorumalıdır.
Gürcüstan tolerant dövlətdir. Burada illərdir, müxtəlif dillərdən
olan xalqlar yaşayırlar. Bu xalqlardan biri də Azərbaycanlılardır.
Gürcüstanın Əməkdar jurnalisti Binnət Əli oğlu Məmmədov Azərbaycan
dilinin Gürcüstanda tədrisi, dilin qorunub-saxlanılması ilə bağlı
“Marneuli” radiosuna danışdı.
Onun sözlərinə görə, “Ana Dili Günü”nün qeyd olunması nəticəsində
insanlara öz dillərini qoruyub-saxlamaq, inkişaf etdirmək üçün şans
yaranıb.
Əməkdar jurnalist deyir ki, dil bir xalqın varlığını təsdiq edən
əsas amildir. Buna görə də dilin yaxşı öyrənilməsi, inkişaf etməsi
üçün ilk növbədə orta məktəblərdə dilin tədrisi prosesi
gücləndirilməlidir.
“Bu günü bütün xalqlara öz dilini, mədəniyyətini
qoruyub-saxlamaq üçün bir şans kimi qəbul etmək olar. Ana dili
insanın mənəvi aləminin zənginləşməsində, dünyagörşünün
formalaşmasında, mükəmməl təhsil almasında, dostlarla ünsiyyət
qurmaqda mühüm rol oynayır. Dil xalqın varlığını təsdiq edən bir
amildir. Həmin xalqın milli kimliyini də təsdiq edir. Millətin
əlifbası onun millət olaraq formalaşmasında vacib şərt olaraq qəbul
olunur. Hər kəs öz dilini qoruyub saxlamaq uğrunda mübarizə
aparmalıdır. Tarixdən məlumdur ki, dilini itirən xalq məhvə
məhkumdur. Biz də bir Azərbaycanlı olaraq bizim qəzet vasitəsi ilə
Gürcüstan dövlətinin bizə verdiyi şansdan faydalanaraq öz dilimizi
qoruyub-saxlamağa çalışırıq. Problemlər ondan ibarətdir ki, ilk
növbədə orta məktəblərdən bu dilin tədrisinin qayğısına qalmaq
lazımdır. Uşaq dil açanda, yeriyəndə ətrafdakılarla ilk olaraq öz
ana dilində danışmalıdır. Danışıq dilini hər kəs bilə bilər, amma
dərinliyinə getmək, qrammatik qayda-qanunları öyrənmək ilk olaraq
orta məktəbdən başlayır. Ana dilinin tədrisi ilk olaraq peşəkarlar,
mütəxəssislər tərəfindən tədris olunmalıdır. Saatların sayı çox
olmalıdır, çünki dilimiz zəngindir. Onun öyrənilməsi üçün vaxt və
metodika lazımdır. Bu da orta məktəblərdə baş verməlidir. Orta
məktəblərdə tədris gücləndirilməlidir”.
Binnət Məmmədov həmçinin dilin düzgün tədrisi üçün Təhsil
nazirliklərinin üzərinə böyük məsuliyyət düşdüyünü də vurğuladı. O,
bildirdi ki, Azərbaycandan kənarda yaşayanlar üçün Təhsil
nazirliklərinin birgə razılıqları əsasında dilin inkişafı yolunda
bir sıra işlər görülməlidir.
O, son zamanlar Borçalıda insanların türk ifadələrinə də üstünlük
verməsindən danışdı.
Məmmədov deyir ki, insanların bəzi türk ifadələrindən istifadə
etməsini o, müsbət qarşılayır.
“Azərbaycandan kənarda Təhsil nazirlikləri arasında
müəyyən anlaşma olmalıdır, dil mübadiləsi ilə bağlı razılıq
olmalıdır. Dilin yaşaması, inkişafı, qorunması üçün qayğı
göstərilməlidir. Türk xalqının öz dilinə olan qayğısının bir
nümunəsidir. Biz müəyyən sözləri təbii olaraq, bir kökdən, bir
soydan olduğumuza görə, o sözlər şəxsən Borçalıda çox sözlər
işlədilir, türk sözləri işlədilir. Bu qədər geniş şəkildə heç vaxt
işlədilməmişdi. Bu həm dilə sevgidən, həm də türk xalqının öz
dilinə göstərdiyi qayğıdan irəli gəlir. Burada mən qəbahətli bir
şey görmürəm. Sadəcə olaraq bizim ədəbi dilimizin normaları var və
bunu orta məktəblərdə daha yaxşı tədris etmək
lazımdır”.
Qeyd edək ki, fevralın 21-i bütün dünyada Beynəlxalq Ana Dili Günü
kimi qeyd olunur. 1999-cu ilin noyabrında Banqladeş səfirinin
təşəbbüsü ilə UNESCO tərəfindən fevralın 21-i Beynəlxalq Ana Dili
Günü elan edilib.
Beynəlxalq Ana Dili Günü 1952-ci il fevralın 21-də Banqladeşin
Benqal şəhərində öz ana dilinin rəsmi dil olması uğrunda mübarizə
aparan 4 tələbənin öldürülməsi hadisəsini bir daha insanların
xatirəsində canlandırır.