Türkiyədə baş vermiş zəlzələ nəticəsində zərər çəkən insanlara yardım məqsədi ilə Marneuli rayonunun Qurdlar ərazi vahidliyində yardım aksiyası keçirilib. Aksiya çərçivəsində insanlar evlərində yararlı olan müxtəlif qış geyimlərini, döşəkləri, yorğanları, yastıqları, ədyalları, ayaqqabıları və s. kimi müxtəlif vasitələri yardım paketlərinə əlavə edərək, təyin olunan məkana təhvil veriblər.

Həmin əşyalar kənd sakinləri tərəfindən Tbilisidə yerləşən “ELİT TRANS” beynəlxalq yük daşıma şirkətinin anbarına təhvil verilib və yaxın günlərdə Türkiyəyə göndəriləcək.

Qeyd edək ki, Marneuli rayonun Qurdlar inzibati ərazi vahidliyinə daxil olan kəndlərindən Türkiyədə baş vermiş zəlzələ nəticəsində zərər çəkənlərə 9 551 lari maddi yardım da köçürülüb. Maddi yardım Qurdlar, Baydar, Böyük Muğanlı və Lejbəddin kəndlərindən toplanıb. Toplanan məbləğ Türkiyənin Gürcüstandakı səfirliyinin bank hesabına köçürülüb.

Onu da əlavə edək ki, yardım aksiyası Marneuli ilə yanaşı Bolnisi, Dmanisi, Qardabani, Tbilisi və digər bölgələrdə də həyata keçirilib. Kampaniya çərçivəsində pul, geyim və digər əşyalar toplanaraq Türkiyəyə göndərilib.

Xatırladaq ki, fevralın 6-da episentri Türkiyənin Kahramanmaraş vilayətinin Pazarcık rayonun olan 7,7 bal və 9 saat sonra episentri eyni vilayətin Elbistan rayonu olan 7,6 bal gücündə iki zəlzələ olub.

Güclü yeraltı təkanlardan sonra bölgədə 6,6 baladək 10 000-dən çox afterşok qeydə alınıb. İki zəlzələ həmçinin Livan, Kipr, İraq, İsrail, İordaniya, İran və Misirdə də hiss edilib.

Təbii fəlakət Türkiyə və Suriyada böyük dağıntı və on minlərlə itkiyə səbəb olub. Türkiyənin zəlzələ baş vermiş 10 vilayətində 3 aylıq fövqəladə vəziyyət elan olunub.

Bu hadisə Türkiyədə 1939-cu ildən bəri qeydə alınan ən güclü zəlzələ kimi tarixə düşüb.