Kvemo Kartlini təmsil edən deputatlar “agentlər” haqqında “rus
qanununun” ikinci oxunuşunda iştirak etməyiblər.
Bu gün, 10 mart tarixində Gürcüstan Parlamenti “Gürcü Arzusu”
tərəfindən dəstəklənən “xarici təsir haqqında” qanun layihəsinin
ikinci oxunuşunu dəstəkləməyib.
1 lehinə və 35 əleyhinə - “agentlər” haqqında “rus qanununun”
ikinci oxunuşu bu nəticə ilə başa çatıb.
“Rus qanununu” dəstəkləyən bir deputat çoxluğun üzvü Dito
Samxaradzedir. “Gürcü Arzusunun” digər deputatları səsvermədə
iştirak etməyiblər. “Rus qanununa” qarşı yalnız müxalifətçilər səs
verib.
Qeyd edək ki, Parlament 7 mart tarixində, təcili qaydada “agentlər”
haqqında “rus qanununu” dəstəkləyib. Bu Parlament qarşısında
genişmiqyaslı aksiyalara səbəb oldu. “Rus qanununu” dəstəkləyən
deputatlar arasında Parlamentin Marneuli və Qardabani seçki
dairəsindən seçilmiş majoritar deputatı Zaur Darğallı, Bolnisi,
Dmanisi, Tetritskaro, Tsalka seçki dairəsindən seçilmiş majoritar
deputatı Qoqi Meşveliani, Parlamentin deputatı Savalan Mirzəyev də
var.
“Marneuli” radiosu qanun layihəsinin qeydiyyatdan keçdiyi gündən
Zaur Darğallı və Savalan Mirzəyevlə əlaqə saxlamağa çalışır. Ancaq
onlar bizim zənglərimizə cavab vermirlər.
7-8 mart tarixində güc strukturları nümayəndələri dinc etirazçılara
qarşı gözyaşardıcı qazdan və su şırnağından istifadə ediblər.
DİN 7-8 mart aksiyalarında 133 nəfəri saxlayıb. Saxlanılanlar
dünən, 9 mart tarixində azad ediliblər. Onlardan bir neçəsinə
cərimə tətbiq olunub, bəziləri isə hələ də məhkəmə prosesini
gözləyirlər.